Хэдхэн жилийн өмнө брэнд менежерүүдийн хувьд дижитал маркетинг нь дадлагын ажилтандаа сошиал сувгуудаа хариуцуулж өгөөд “Учрыг нь ол” гээд хаячихдаг зүйл байлаа. Гэтэл өнөөдөр энэ нь сурталчилгааны салбарын гол тулгууруудын нэг болжээ. Салхи хаашаа, үүл тийшээ гэдгийн адилаар хэрэглэгчдээ даган сурталчилгааны салбар ч шилжиж буй. Үүнийг 2017 онд дижитал сурталчилгааны нийт орлого 88 тэрбум ам.долларт хүрч өмнөх жилээс 21 хувиар өссөнөөс харж болох. Энэ дундаа сошиал талбараас цуглуулсан орлого нь 22.2 тэрбум ам.доллар байгаа нь 36 хувийн өсөлт юм. Дэлхий нийтийг хамарч буй энэхүү дижитал маркетинг манай улсад дөнгөж хөлд орж байна.

Монголын ихэнх компаниуд 2014 оноос хойш сошиал дагагчид ба “like” -аа өсгөхөд анхаарсан масс маркетингийн шинжтэй байсан бол ирэх онд хэрэглэгчдээ шигшсэн, илүү нарийвчлалтай дижитал маркетингийн ид шидийг жинхэнээсээ үзнэ. Тодруулбал, 2019 онд агуулгын /content/ буюу, сэтгэл зүйд тулгуурласан нөлөөллийн маркетинг трэнд болно. Дижитал маркетинг нь технологиос шууд хамааралтай. Маркетингийн технологи буюу мартек нь 2016 онд 3500 байсан бол 2018 онд энэ тоо хоёр дахин өсч 7000 гаруй болжээ. Маркетерууд зорилтот хэрэглэгчээ татахад интернэт болон үүлэн тооцооллын микро сервесүүдийг ашигладаг бөгөөд үүнийг дижитал маркетинг гэдэг. Монголд 2018 оны байдлаар 120 мянган бизнесийн байгууллага байдаг ч тэдний 47 мянга орчим нь нийгмийн шимтгэл тогтмол төлдөг буюу хууль ёсных.

Өндөр технологийн “HubSpot” компанийн Монгол дахь түнш “BZP Digital&Inbound” инбаунд маркетингийн агентлагийн гүйцэтгэх захирал Б.Батзориг “Миний таамаглаж буйгаар Монгол компаниудын ердөө 10 хувь нь үүлэн тооцооллын программаас ашиглаж эхэлсэн” гэлээ. Түүнчлэн энэ талаар баттай судалгаа байдаггүй бөгөөд байгууллагын нууц гээд мэдээллээ ил болгодоггүй аж. Монголын Үндэсний Маркетингийн Холбоо болон “MMCG” судалгааны байгууллага хамтран Монголын топ 50 аж ахуйн нэгжийн маркетингийн ажлыг судалжээ. Эдгээр компанийн 60 хувь нь сурталчилгааны кампанит ажлынхаа үр өгөөжийг хэмждэг ч 92 хувь буюу дийлэнх нь зөвхөн борлуулалтын орлогыг л хардаг.

Мэргэжилтнүүдийн үзэж буйгаар маркетерууд өөрсдийгөө хэрхэн ажилласныг хэрэглэгчдээрээ хэмжүүлэх учиртай. Шинэ тоглоомын дүрэм Телевизээр цацагдаж буй сурталчилгааг үзэгчдийн 83 хувь нь үзэхгүйгээр сувгаа сольдог бол масс и-мэйл хүлээн авагчдын 97 хувь нь нээхгүйгээр шууд устгадаг байна. Харин утсаар холбогдож бараа бүтээгдэхүүнээ санал болгоход хэрэглэгчдийн 48 хувь нь дургүйцэж, дуудлагаа дундаас нь тасалдаг. Хуучны юм ул болж шинэ юм зул болоход маркетерууд сошиал талбарт сурталчилгаагаа цутгах болсон. Гэхдээ хэрэглэгчид залхаасан олон зурган сурталчилгааг тогтож үзэхгүй гүйлгэчихдэг нь дижитал шилжилт рүү хувьсах хэрэгтэйг харуулж болох. Тиймээс биз несийн байгууллагууд 2019 онд сурталчилгаагаа бүх сувгаар баруун солгойгүй ца цах нь оновчтой маркетинг биш гэдгийг ухааран, үйлдэл болгоно.

Өмнө нь маркетерууд юүлүүр хоолойн зарчим буюу маркетингаар эхлээд бор луулалтаар дамжаад хэрэг лэгчдэд хүрч ажилладаг байв. Одоо хэрэглэгч төвтэй эргэх хө дөлгүүр буюу “Inbound” маркетингаар ажиллана. Үүнд агуулга /content/ гол дүр бүтээнэ. Энэ нь хүмүүсийн дур сонирхол, хэрэгцээтэй холбогддогоороо анхаарал татам. Тиймээс хэрэглэгчийн тухайн бүтээгдэхүүн, компани, брэндэд итгэх итгэлийг тогтоон барихад тусалдаг. Агуулгаар дамжин худалдан авалт хийсэн хэрэглэгчидтэйгээ эргэн холбогдож харилцаа үүсгэн дахин өөртөө татахаас гадна шинэ хэрэглэгчийг тэднээр дамжуулан олох боломжтой. “HubSpot” компанийн гаргасан судалгаанд хэрэглэгчид гэнэн, итгэмтгий биш болжээ. Судалгаагаар нийт хэрэглэгчдийн гуравхан хувь нь маркетинг, борлуулалтын ажилтанд итгэдэг.

Мөн 47 хувь нь борлуулалтын төлөөлөгчтэй холбогдохоос өмнө тухайн бүтээгдэхүүний тухай 3-5 сэтгэгдэл, санал гомдол, тайлбар, үнэлгээ гэх мэт агуулгын шинжтэй материал уншиж, үздэгийг “Demand Gen Report” тайлан харуулж байна. Дээрх судалгаанаас харахад шинэ хэрэглэгч олно гэдэг од харвахтай адил болжээ. Тиймээс маркетерууд өөрсдийн хэрэглэгчдийнхээ хүрээнд эргэх холбоогоо сайжруулж, бөөцийлөх нь хамгийн үр дүнтэй арга гэдгийг Интернэт Маркетинг Конференцийн үеэр мэргэжилтнүүд онцолж байлаа. Тухайн нэг бүтээгдэхүүн, үйлчилгээг өмнө нь сонгож байсан л бол дахин авах магадлал шинэ хэрэглэгчээс харьцангуй өндөр байдаг.

Тухайлбал, үйлчилгээний ажилтан хэрэглэгчдэд ямар нэгэн байдлаар тусламж үзүүлсэн үед нийт үйлчлүүлэгчдийн 91 хувь нь өмнөх бүтээгдэхүүн, үйлчилгээнээсээ татгалзаж тусламж үзүүлсэн тухайн компанийг сонгодог. Мөн үйлчилгээний ажилтан нь бас юу л бол. Тэд ч мөн сурталчилгаагаа чирээд дижитал болж буйг мартаж үл болно. Маркетерүүд одооноос хөрөнгө оруулалтын сангийн менежер шиг бүтээгдэхүүнээ сошиал ба бусад сувгын онцлогт тохирсон олон янзын агуулга бэлдэж, оновчтой тараах болно. Нөгөө талаас Монголд үүлэн тооцооллын программ, микро сервес битгий хэл дата /өгөгдөл/ мэдээллийг хэрхэн удирдахаа мэдэхгүй маркетер олон байна. Гэхдээ ирэх оноос үүнийг ойлгож, ашиглаж эхлэхгүй аваас маркетер та маркетингийн дижитал платформыг нэвтрүүлж буй мэргэжлийн үйлчилгээ үзүүлдэг компанид ажлаа алдах вий.

1 Star2 Stars3 Stars4 Stars5 Stars (No Ratings Yet)
Loading...
Х. Саранзаяа

ВОМЭНОМИК

Өмнөх нийтлэл

Сайжрахын хэрээр

Дараагийн нийтлэл

1 Сэтгэгдэл

  1. Их сайхан хэрэгтэй олон мэдээлэл байлаа маш их баярлалаа

Сэтгэгдэл үлдээх

Таны и-мэйл нийтэд харагдахгүй. * тэмдэглэсэн талбарыг заавал бөглөнө үү.

This site uses Akismet to reduce spam. Learn how your comment data is processed.

Танд санал болгох