ЖДҮ эрхлэгчдийн хувьд санхүүгийн асуудлаас гадна сургалт, мэдээллийн хэрэгцээ маш их байдаг. Тэгвэл Азийн хөгжлийн банк, Европын хөрөнгө оруулалтын банк, Нийслэлийн ЗДТГ хамтран “ЖДҮ үйлчилгээ эрхлэгчдийн хөгжлийн төв”ийг байгуулжээ. Олон улсын жишгээр тоноглосон энэ төвд нийслэлийн бизнес эрхлэгчдэд санхүү, маркетинг, хууль эрх зүй, төсөл хөтөлбөр, мэдээлэл технологи, инновацыг хөгжүүлэх, хөдөлмөр зуучлалын чиглэлээр зөвлөгөө өгөх аж. Мөн төрөл бүрийн сургалтад хамрагдах боломжтойг тус төвийн нээлтийн үеэр мэдээллээ.
Нийслэлийн Жижиг, дунд үйлдвэр, үйлчилгээг дэмжих төв НӨҮГ-ын дарга Г.Гангамөрөнгийн мэдээлснээр Улаанбаатар хотод нэг сая орчим хөдөлмөрийн насны иргэн байдгаас 700 мянга нь жижиг, дунд үйлдвэр, үйлчилгээ, өрхийн бизнес эрхлэгч байдаг байна. ЖДҮ үйлчилгээ эрхлэгчдийн хөгжлийн төв дээр 15 топ аж ахуй нэгжид өрөө гаргаж, жижиг, дунд үйлдвэр, үйлчилгээ эрхлэгчдээ дэмжиж, бойжуулж, жижгийг дунд, дундыг том болгох, импортыг орлох, экспортыг орлох бүтээгдэхүүнүүдийг гаргахад дэмжлэг үзүүлнэ гэж тэр хэллээ.
Жижиг, дунд үйлдвэр, үйлчилгээний салбар нь ДНБ үйлдвэрлэлийн 18 хувийг бүрдүүлдэг. Тус салбарт нийт 62.3 мянган жижиг, дунд үйлдвэр үйлчилгээ эрхлэгчид, 906.5 мянган ажиллагсадтайгаар үйл ажиллагаа явуулж байна. Энэ нь нийт хөдөлмөрийн зах зээлийн 67.2 хувийг эзэлж байна. Үүнээс 43.2 мянган жижиг, дунд үйлдвэр, үйлчилгээ эрхлэгч нийслэлд төвлөрч, Улаанбаатар хотын нийт хүн амын 44 хувийг бүрдүүлдэг онцлогтой.
wpDiscuz