Бидний мэддэг юм уу гэхээр мэдэхгүй, мэдэхгүй юм уу гэхээр мэддэг ойлголтуудын нэг бол дижитал маркетинг. Үүнийг зөвхөн сошиал медиа маркетингаар төсөөлдөг өрөөсгөл ойлголт түгээмэл. Гэтэл дижитал маркетинг нь вэбсайт, имэйл, хайлтын системийн оновчлол, сэжим зэрэг олон суваг, арга хэрэгслүүдийг багтаасан өргөн ойлголт билээ. Эдгээрийг уялдаа холбоотой, цогц байдлаар ашиглаж чадаж байгаа эсэхтэй маркетингийн үр өгөөж шууд хамааралтай байдаг. Тэгвэл танай байгууллага дижитал маркетингийн боломжийг бүрэн ашиглаж чадаж байна уу? 

Орхигдуулсан боломж

Бидний хамгийн өргөн ашигладаг маркетингийн суваг бол сошиал медиа. Хэрэглэгчдэд мэдээллээ хүргэх, хоёр талт харилцаа үүсгэх зэрэг олон давуу талыг сошиал медиа олгодог ч эцсийн дүндээ “хүний” л суваг. Учир нь мэдээллээ түгээхэд тухайн сошиал сувгийн бодлого, дүрэм, форматад захирагдах шаардлага гардаг. Энэ утгаараа вэбсайт нь аливаа компанийн дижитал орчин дахь “гэр” бөгөөд энд байгууллагынхаа тухай цогц мэдээллийг хүссэн загвар дизайнаараа хийж болдгоороо давуу талтай. Түүнчлэн вэбсайт бол сурталчилгаа, борлуулалтын гол сувгуудын нэг. Гэтэл олон байгууллага вэбсайтаа ёс төдий нээж хөгжүүлэлгүй орхисон байдаг.  

Хөрөнгө оруулалтын өгөөж хамгийн өндөртэй дижитал маркетингийн суваг бол имэйл маркетинг. Имэйлээр спам их ирдэг тул байгууллагууд тус сувгийг буруу ойлгож, дутуу ашигладаг. Нэг дор хэдэн зуун хүнд хүсээгүй байхад нь сурталчилгаа явуулах бол спам маркетинг. Тухайн байгууллагаас мэдээлэл авах хүлээлттэй байгаа хүнд тохирсон, хэрэгтэй мэдээллийг нь явуулж байж имэйл маркетинг болно. Тухайлбал, танай бүтээгдэхүүнийг сонирхож буй хүнд түүнтэй нь холбоотой контент, сурталчилгаа, ньюслеттер, үнийн санал зэрэг төрөл бүрийн мэдээллийг явуулна гэсэн үг.

Хэрэглэгч бүрийн хэрэгцээ шаардлагыг тодорхойлж, түүнд нь тохирох сурталчилгааг явуулж, улмаар борлуулалтад хөтлөх зэрэг олон ажлыг автоматжуулах боломжийг дижитал маркетинг олгодог.

Урт хугацаанд өндөр өгөөж өгдөг өөр нэг арга бол хайлтын системийн оновчлол. Вэбсайтдаа оруулж буй мэдээлэлд тухайн салбар, чиглэлд түгээмэл ашигладаг түлхүүр үгийг ашигласнаар вэбсайтынхаа органик хандалтыг нэмэгдүүлэх боломжтой. Энэ мэтчилэн дижитал маркетингийн суваг бүр өөр өөрийн сул болон давуу талтай.

Компаниуд эдгээр сувгийг ашиглан ямар нэг байдлаар олон сувгийн (multichannel) маркетинг хийдэг ч цогц байдлаар хийж чаддаггүй. Хэрэглэгчээ таньж олон сувгаар харилцан уялдаатай маркетинг, цаашлаад борлуулалт хийж чадаж байвал үүнийг omnichannel маркетинг гэнэ. Тухайлбал, хэрэглэгч танай байгууллатай имэйл эсвэл чатботоор харьцаж байсан бөгөөд түүний ямар бүтээгдэхүүн, үйлчилгээ авч байсныг мэдээд түүнд хэрэгтэй зүйлийг санал болгоно гэсэн үг.

Гэтэл ийм маягаар хэрэглэгч бүрийг таньж, хүрч үйлчилнэ гэвэл ямар ч том компанийн цаг хугацаа, хүний нөөц хүрэлцэхгүй. Тиймээс энэ процессыг автоматжуулах шаардлагатай. Үүний тулд хэрэглэгчийн өгөдлийн сан буюу CRM системтэй байх хэрэгтэй. Ийм төрлийн системийн тусламжтайгаар тухайн хэрэглэгчийн хэн болох, юу сонирхож байгаад аваагүй, ямар худалдан авалт хийсэн зэрэг мэдээллийг бүртгэж, улмаар сегментчлэх боломжтой. Ингэхдээ байгууллагын зорилго, үйл ажиллагааны чиглэлээс шалтгаалан ямар өгөгдөл, сувгийг түлхүү анхаарах хэрэгтэйг тодорхойлдог.

Сэжим ба сэжмийн арчилгаа

Боломжит худалдан авагчийнхаа мэдээллийг бүртгэж ирээдүйн борлуулалтын сэжим үүсгэх нь дижитал маркетингийн хамгийн чухал ойлголтуудын нэг. Чанартай сэжим хэр олныг үүсгэж чадна, тэр чинээгээр борлуулалтаа өсгөх боломж нэмэгдэж байдаг. Бүтээгдэхүүний каталоги татаж авч байгаа, мессенжерээр тодорхой мэдээлэл авч буй эсвэл зөвлөгөө авч байсан хүмүүс нь танай боломжит хэрэглэгчид бөгөөд сэжим үүсгэх төрөл бүрийн аргууд бий. Тухайлбал, технологийн компаниуд бүтээгдэхүүнийхээ демо хувилбар эсвэл нэг сар үнэгүй хэрэглэх эрхийг бэлэглэдэг бол автомашин борлуулагчид туршилтын жолоодлого хийлгэдэг. Хурал цуглаан, арга хэмжээний үеэр байгууллагуудын нэрийн хуудсыг цуглуулах нь ч сэжим үүсгэх нэг арга юм. Байгууллагын утсаар холбогдож буй хүмүүсийн мэдээллийг бүртгэх ч мөн адил.

Бүтээгдэхүүн, үйлчилгээ яагаад хэрэгтэй болохыг ойлгуулах мэдээлэл, сурталчилгааг цэгцтэй байдлаар хүргэх замаар үүсгэсэн сэжмээ арчилж, улмаар худалдан авалтад хөтөлнө.

Сэжим үүсгээд хаячихаж болохгүй бөгөөд түүнийгээ арчлах хэрэгтэй. Тухайлбал, танай бүтээгдэхүүн, үйлчилгээний талаар цахим номыг татаж авсан хэрэглэгчид үүнтэй нь холбоотой мэдээлэл, зөвлөгөө, сурталчилгааг ажлын 2-3 хоногийн зайтай имэйлээр явуулах боломжтой. Тухайн бүтээгдэхүүн, үйлчилгээ яагаад хэрэгтэй болохыг ойлгуулсан мэдээлэл, сурталчилгааг цэгцтэй байдлаар хүргэх замаар үүсгэсэн сэжмээ арчилж, улмаар худалдан авалтад хөтөлнө.

Имэйлийг B2B сурталчилгаанд илүү үр дүнтэй гэж үздэг бол сэжмийн арчилгааг фэйсбүүкээр ч хийх боломжтой. Жишээ нь, видео үзсэн хүмүүсийн бүлгийг үүсгэж тухайн бүтээгдэхүүнтэй холбоотой мэдээллийг явуулах. Хүмүүст хэрэгтэй мэдээллийг шат дараатай өгсний дараа бүтээгдэхүүн, үйлчилгээгээ санал болгох хэрэгтэй. Хэрэглэгч танай байгууллагын фэйсбүүк хуудсаар ороход чатботтой байх нь чухал. Учир нь чатбот нь хэрэглэгчийн нэр, зураг, хүйс, PSID зэрэг тодорхой мэдээллийг автоматаар авдаг. PSID нь хэрэглэгч танай хуудсаар зочлоход фэйсбүүкээс үүсгэдэг ID бөгөөд үүнийг төлбөртэй сурталчилгаандаа ашиглах боломжтой. Шууд өгөгдлөөс гадна ямар бүтээгдэхүүн сонирхож байна, аль бичлэгийг үзэв гэх зэргээр үйлдлээс маш их хэмжээний өгөгдөл үүсч байдаг бөгөөд эдгээрийг чатбот ашиглан цуглуулах боломжтой.

Хэрэглэгч аливаа бүтээгдэхүүний сурталчилгааг үзэх, сонсох гэх зэргээр дунджаар 10 удаа хүрэлцэж байж худалдан авалтын шийдвэр гаргадаг. Иймд хэрэглэгч танай бүтээгдэхүүнийг сонирхох, судалж эхлэх, харьцуулах, худалдан авалт хийсний дараа гэх мэт үе шат бүрд тохирсон мэдээлэл, сурталчилгааг явуулах нь чухал. Худалдан авалт хийсний дараа урамшууллын мэдээлэл явуулах нь тохиромжгүй бөгөөд үүний оронд авсан бүтээгдэхүүнтэй нь хослох бүтээгдэхүүн, нэмэлт заавар зэрэг зүйлийг санал болгоорой. Заавал сурталчилгаа хийх зорилгоор бус хэрэглэгчийн сэтгэл ханамжийг дээшлүүлэх зорилгоор ч мэдээлэл явуулах боломжтой.

Хэрэглэгч аливаа бүтээгдэхүүний сурталчилгааг үзэх, сонсох гэх зэргээр дунджаар 10 удаа хүрэлцэж байж худалдан авалтын шийдвэр гаргадаг.

Сурталчилгаа хийсэн л бол үр дүнгээ хэмжих хэрэгтэй. Дижитал маркетингийн хамгийн түгээмэл суваг болох фэйсбүүкийн сурталчилгаагаар жишээ авъя. Тухайн сурталчилгааны харагдалт, хандалт, линк даралт, видео үзэлт зэрэг нь маркетингийн үзүүлэлтүүд. Харин тухайн сурталчилгаа борлуулалтад нөлөөлсөн эсэхийг мэдэхийн тулд борлуулалтын мэдээллээ кодлоод фэйсбүүкт өгч болно. Ингэснээр фэйсбүүк тухайн мэдээллийг өөрт буй хэрэглэгчдийн өгөгдөлтэй харьцуулж танай сурталчилгаа хэдэн хүний, хэдэн төгрөгийн худалдан авалтад нөлөөлснийг тооцоолж өгдөг. Ийм аргаар хөрөнгө оруулалтын өгөөжөө тооцох ажлыг ч автоматжуулах боломжтой.

Энэ мэтчилэн хэрэглэгч бүрийн хэрэгцээ шаардлагыг тодорхойлж, түүнд нь тохирох сурталчилгааг явуулж, улмаар борлуулалтад хөтлөх зэрэг олон ажлыг автоматжуулах боломжийг дижитал маркетинг олгодог. Гагцхүү та боломжоо ашиглаж чадаж байна уу гэдэгт асуудал оршино.

1 Star2 Stars3 Stars4 Stars5 Stars (No Ratings Yet)
Loading...
Б. Батзориг

Зөвхөн танайхыг сонгодог хэрэглэгчидтэй болох нь (№101)

Өмнөх нийтлэл

И-мэйлийг хэрхэн үр дүнтэй ашиглах вэ?

Дараагийн нийтлэл

Сэтгэгдэл

Leave a reply



Your email address will not be published. Required fields are marked *

This site uses Akismet to reduce spam. Learn how your comment data is processed.