Амралтын өдрөөрөө дугуй дээрээ сэлгүүцэх хуульчийн амар амгалан
Энди Хонолес нь Клейнберг Каплан хуулийн фирмд менежерээр 2006 оноос хойш ажиллаж буй. Түүний өдөр тутмын ажилд үл хөдлөх хөрөнгийн том том гэрээнүүдийг цэгцлэх болон хөрөнгө оруулалтын бусад ажлуудын хуулийн чиглэлийг хариуцах чиглэлүүд багтдаг. 2011 оноос хойш тэрбээр Нью-Иоркийн Супер хуульч шагнал авсаар байгаа юм. (Уг шагналыг жил бүр Нью-Иорк хотын шилдэг 100 хуульчдад өгдөг уламжлалтай юм)
Энди Хонолес эхнэртээ “Өглөө дугуйтайгаа гараад ирье” гэх нь түүнийг оройн хоолноос нааш ирэхгүйг илтгэнэ. Учир нь түүний дугуйн аялал ихэвчлэн 200 км үргэлжилдэг.
Анх 1997 онд Хонолес Нью-Иоркийн нэр хүндтэй хуулийн фирмүүдэд зөвлөхөөр ажилладаг байхдаа анхныхаа мэргэжлийн дугуйг авч байв. Энэ үеэс тэрбээр дугуйн спортын марафон гэгддэг дугуйн 160 км-ын аяллыг хийж эхэлсэн юм. 2001 онд Аляскад болсон зургаан өдөр үргэлжлэх 800 км-ын (Улаанбаатараас Өвөрхангай ороод ирэх зай) сайн дурын уралдаанд орсон нь түүний анхны тэмцээн байв.
Үүнээс хойш 57 настай Хонолес дугуйн уртаас урт аяллын хорхойтон болох нь тэр. Сүүлийн арван жилд тэрбээр нэг өдрийн 300 км-ын аяллыг дор хаяж арваас доошгүй хийгээд буй. Дугуй унахад урдаас ирэх агаарын урсгалыг багасгахын тулд түүний 1.93 метр өндөр бие өөрийг нь илүү бөгтийж, улам тонгойх сорилт болдог. Эхнэр нь түүнд дугуйн дээр хэт олон цагийг зарцуулснаас болоод мөр нь үргэлж урагшаагаа атийгаад байдгийг байнга сануулна.
Олон жил ганцаараа дугуй унасны эцэст тэрбээр дугуйн дасгалжуулагч авахаар шийдэв. Ийнхүү дасгалжуулагчдаа бэлтгэлээ шалгуулсны дараа зарим хөдөлгөөнийг техникийн дагуу хийдэггүй байснаа ойлгожээ. Үр дүнд нь тогтмол хурдаар, эрч хүчээ илүү ухаалаг хуваарилан дугуй унадаг болов. Зүрхний цохилтоос нь илүү дугуйных нь хурд хэмжигч түүнд илүү ихийг хэлдгийг мэдэж авлаа. Мөн дасгалжуулагчийнхаа ачаар илүү ухаалаг бэлтгэлээ хийдэг болоод зогсохгүй өөрийгөө 30-тай мэт бодож хэтэрхий их дасгал хийдэг байснаа ойлгосон байна. Үүнээс хойш амарч эхэлсэн нь түүний бэлтгэлийг илүү үр дүнтэй болгосон юм.
Яг одоо Хонолес 300 км замыг туулах Дэвисийн дугуйн тэмцээнд бэлдэж байгаа ба нэг өдөр үргэлжлэх уг тэмцээн нь Америкийн Калифорни мужийг хөндлөн гулд туулдаг. Хоёр хүү нь их сургуулийн оюутнууд болчихсон учир цаг зав ихтэйгээ далимдуулж энэ жилдээ багтаад 160-250 км-ын хоёр ч тэмцээнд оролцохоор төлөвлөөд буй.
Бэлтгэл
Хонолес дугуйн бэлтгэлээ долоо хоногийн дөрвөн өдөр хийх бөгөөд үүний хоёр өдөр нь хурдан хэмнэлээр 80-120 минутын турш дугуйгаа жийнэ. Жийхдээ хөлөө солбих замаар хөлнийхөө чадвараа сайжруулахаас гадна уулын өгсүүр замаар мацах аж. Харин үлдсэн хоёр өдөр нь тайван хэмнэлээр дугуйгаа унаснаар түүний дугуйтай бэлтгэл энэ хүрээд дуусдаг.
Ихэнх дугуйчид спортынхоо онцлог болох бусадтайгаа хамт бэлтгэл хийх дуртай бол Хонолес ганцаараа байхыг илүүд үздэг. Энэ нь түүний өдрийн ихэнх үе нь гэр бүлийнхэн, ажлынхантайгаа ойр дотно өнгөрдөгтэй холбоотой. Тийм ч учраас тэрбээр “Би үргэлж цаг гаргаж бусдыг халамжилдаг. Тийм ч учраас дугуй унах нь зөвхөн өөртэйгээ байх цаг болдог. Энэ үеэрээ би дуу сонсож эсвэл зүгээр юу ч бодохгүй давхих дуртай” гэнэ.
Хонолес дугуйн бэлтгэл хангагчтайгаа долоо хоногт хоёр удаа ажиллахдаа дугуй унах барилаа сайжруулахад ихэнх цагийг зарцуулдаг. Дугуйн бэлтгэлд хүний биеийн мөр, нуруу, гэдэс чухал нөлөөтэй. Тийм ч учир биеийн энэ хэсгүүдээ ажиллуулах дасгалыг тогтмол хийх нь ач тустай. Үүнээс гадна тэрбээр долоо хоногт дор хаяж нэг удаа 10-15 км гүйдэг аж. Биед ачаалалтай дугуйн урт замын бэлтгэл хийсэн өдрөө массажинд заавал ордог. Мөн биеийнхээ шингэнийг хадгалахын тулд ус их ууж алхаснаар маргааш нь түүний бие булгардаггүй. Энэ бүх дасгал хөдөлгөөний ачаар түүнд нойрны эм хэрэглэх шаардлага огт гардаггүй ба өдөрт дор хаяж 6-7 цагийн нойр авахыг хичээдэг.
Хоолны дэглэм ба сонсдог хөгжим
Холонес өдөр бүр өглөөний хоолондоо овъёосыг жимстэй хольж иддэг. Харин өдрийн хоолны цэс нь шарсан загас, салат. Өдрийн бусад үеэр юм идмээр санагдвал самар жимс зэрэг жижиг зүйлсээр өлссөн мэдрэмжээ дарчихна. Оройн хоолондоо мөн л загас эсвэл тахианы махыг төрөл бүрийн ногоотой хамт шарж иднэ. Мөн долоо хоногтоо 3-4 удаа Эспрессо уудгаас гадна нэг удаа коктейль шимчихдэг аж. Дугуй унаж байхдаа энерги, усаа хангалттай авах шаардлагатай тул найман минут тутамд уснаасаа хоёр том балгалж 45 минут бүр энергийн гель иднэ. Ингэснээр тэрбээр сүүлийн есөн жил дугуй унахдаа нэг ч удаа хэт их ядарснаас болж дундаас нь больж байгаагүй юм. Дасгалаа эхлэхдээ түүний заавал сонсдог дуу нь “Вальтер Миттигийн нууц амьдрал” киноны дуунууд. Учир нь энэ дуу зөөлөн хэмнэлтэй тул дугуй унаж эхлэхдээ хэтэрхий огцом хэмнэлтэйгээр эхлэлгүйгээр тогтмол хурдаар явахад нь их тусалдаг тухайгаа тэрбээр ярьж байна.
Дугуй унах байрлал уг спортод хамгийн чухал бөгөөд зөв техник сурахгүй бол урт хугацаандаа гэмтэл ч авах аюултай аж
Дугуйн техник
Хэрэв чиний биеийн хэмжээ дугуйнд чинь таарахгүй бол сайнаасаа саар нөлөө нь их байдаг талаар спортын дасгалжуулагч Сара Бресник ярьжээ. Дугуйг барих гарын олон байрлал байдаг. Гар дээрээ ирэх даралтаа багасгахын тулд босоогоор жийж болох ч ихэнх үедээ сууж л дугуйг унана. Дугуй унах байрлал уг спортод хамгийн чухал бөгөөд зөв техник сурахгүй бол урт хугацаандаа гэмтэл ч авах аюултай аж. Хэрэв суудал өндөрдөж эсвэл намдаж буй тохиолдолд нурууны чинь доод хэсэг болон өвдөг өвдөнө. Хэрэв дугуйны суудал бариулаасаа хэт хол бол чиний мөр, хүзүү болон нурууны доод хэсэг хөндүүрлэдэг. Мөн дугуйн дөрөө болон гутал нэг түвшинд биш бол хөл чинь ч өвдөх аюултай. Бресник зөвлөхдөө “Хэрэв хэт холын зайнд дугуй унахаар төлөвлөж байгаа бол бага багаар дугуй унах зайгаа ихэсгэх хэрэгтэй”. Хэрэв дугуй чинь чамд яг таарч байгаа ч чи биеийнхээ аль нэг хэсэгт өвчин мэдэрч байгаа бол спортын дасгалжуулагчтай ажиллахыг тэрбээр санал болгож байна. Эцэст нь йогийн хөдөлгөөн, гэдэсний дасгал болон тэнцвэрээ сайжруулах бэлтгэл дугуй унахад хэрэгтэй байдаг аж.
Уг нийтлэлийг Wall Street Journal-аас авав.
