Монгол Улсад атар газар эзэмшсэний 60 жилийн түүхэн ойн хүрээнд өнгөрсөн бямба, ням гаригт Улаанбаатар хотод “Агро Экспо-2019” олон улсын үзэсгэлэн худалдаа болж өнгөрлөө. Арга хэмжээний нээлтэд Хүнс, хөдөө аж ахуй, хөнгөн үйлдвэрийн сайд Ч.Улаан, Нийслэлийн Засаг дарга бөгөөд Улаанбаатар хотын захирагч С.Амарсайхан оролцож уг үзэсгэлэн дээрх бүтээгдэхүүнүүдтэй танилцлаа. Үзэсгэлэнгийн үеэр АДРА Монгол олон улсын байгууллагын “Органик хөдөө аж ахуйн түншлэл” төсөлд хамрагдаж, органик аргаар төмс, хүнсний ногоо хэрхэн тариалах аргад суралцсан ногоочид өөрсдийн бүтээгдэхүүнээр оролцсон юм. Сэлэнгэ аймгийн Алтанбулаг сумын “Баяжих сүүн булаг”, Шаамар сумын “Органик бал”, Сант сумын “Усан хээр” зэрэг хоршооны 131 ногоочин “Сэлэнгэ органик” хамтын баталгаажуулалтын байгууллага байгуулж, органик хүнс үйлдвэрлэлд шилжиж байгаагаа илэрхийлж, тангараг өргөөд байна.
Ингээд та бүхэнд үзэсгэлэнд оролцож байгаа компаниудтай уулзсан товч ярилцлагыг хүргэе.
“Becko” компани
-Та компаниа танилцуулаач?
-Манай компани 2018 онд гадаад худалдааны чиглэлээр анх байгуулагдсан. Үүнээс хойш өөрсдийн брэнд болох Мазаалай хэмээх комбинзон, хамгаалалтын хувцас үйлдвэрлэж байна. Зургаан төрлийн стандарт хангах технологийн хувцсыг Европ стандартаар Монголд эсгэж үйлдвэрлэсэн. Материал нь тусгай зориулалтын 4 давхаргатай, агаар салхи ус нэвтрүүлдэггүй. Бичил тоосонцор, химийн хуурай, шингэн бодист орчинд ажиллахад хүнийг хамгаалах давуу талтай. Мөн шүлхий, тарваган тахал зэрэг өвчний үеэр мал эмнэлгийн ажилтнууд хэрэглэхэд зохимжтой. Энэ хувцсыг бид эх орондоо үйлдвэрлэж байгаа юм. Үйлдвэрлэл маань өнгөрсөн оны есдүгээр сараас эхэлсэн.
-Цаашид ямар зорилготой үйл ажиллагаа явуулж байгаа вэ?
-Яг одоо барилгын компаниуд манайхаас уг хувцсыг худалдаж авч байна. Цаашдаа бид Монгол улсынхаа дотоод хэрэгцээг хангах, цаашлаад ОХУ болон ХБНГУ-д экспортлох зорилготой байна. Яг одоо Герман стандарттай нэг түвшинд үйлдвэрлэж байна. Экспортоор гаргахдаа
-Уг үзэсгэлэнгийн үеэр ямар үр дүн хүлээж байгаа вэ?
-Манайх Орхон аймгийн компани. Тэгэхээр Улаанбаатар хотод өөрсдийнхөө бүтээгдэхүүнийг танилцуулж байна. Хүмүүст нэгэнт брендээ хоногшуулчихвал дараа нь уулзахад ч хэрэгтэй шүү дээ. Бидний зорилго бол дотоодын мал эмнэлгийнхээ нийлүүлэлтийг хангах юм. Хөдөө аж ахуйн яамнаас зохион байгуулж байгаа үзэсгэлэнд оролцлоо. Бид чадахаараа л хичээж байна. Үзэсгэлэнгийн зохион байгуулалтад бид сэтгэл хангалуун байгаа.
Ургамал газар тариалангийн хүрээлэн
-Та байгууллагаа танилцуулаач?
-Ургамал газар тариалангийн хүрээлэн маань ХААИС-ын харьяа компани юм. Таримал ургамлын үр сорт, газар тариаланд хэрэглэж байгаа технологи, суулгац болон үрийг нийлүүлдэг. Өнөөдөр эрдэм шинжилгээний бүтээлүүдээ танилцуулж байна. Хүлэмжийн нарийн ногоо, бусад ногоонуудыг зарж байна.
-Эрдэмтдийн бүтээлийг олон нийтэд худалдаалдаг уу?
-Бид үндсэн олон төрлийн сорт болон эх орондоо шинэ аргаар бий болгосон үрийг үр тарианы компаниудад нийлүүлдэг улсын байгууллага юм. Үйлдвэр маань Дархан хотод байрладаг. Дархан 144 сортыг их хэмжээгээр тариалдаг.
-Нийт хэдэн нэр төрлийн бүтээгдэхүүний дээжийг бий болгосон байгаа вэ?
-Энд үр тариа, жимс хүнсний ногоо гэх мэт 70 гаруй дээжтэйгээр өнөөдрийн үзэсгэлэнд оролцож байна. Монголд болон гадаадад худалдаалдаг 70 мянга гаруй үрийг бид хадгалдаг. Хүрээлэн маань 12 нэгжтэй ба хөрс, генетик, биохими зэрэг олон төрлийн нэгжүүд байдаг.
-Үзэсгэлэнгийн үр дүнг хэрхэн хүлээж байна вэ?
-Бид эрдэм шинжилгээний байгууллага учраас энгийн иргэд ойлгох нь бага. Төмсийг нэг л төмс гэж хардаг бол дотроо олон сорт байдаг. Тиймээс хэрэглэгчдийг манай үйл ажиллагааг, судалгааг илүү таньж мэдээсэй гэж хүсч байна.
