Economist-ын”Дэлхий 2019″ сэтгүүлээс хүргэж байна.
Бүгдийг захирах нэгэн үеийнхэн. 1946-1964 он хүртэлх буюу төрөлтийн оргил үеийнхэн (babyboomers) сүүлчийн 50 жилийн хугацаанд Америкт хамгийн өндөр насны бүлэг байсан. 1993 оноос хойших дөрвөн ерөнхийлөгч энэ үеийнх байлаа. Харин 2019 онд тэдний ноёрхол эцэстээ хүрнэ. Үе хэмээх ойлголт хатуу хязгааргүй зүйл боловч нийтээр хүлээн зөвшөөрдөг тодорхойлолтыг ашиглан Pew Research Centre-ийн тооцож буйгаар 2019 онд төрөлтийн оргил үеийнхэн тооны бусад үеэс цөөрөх ажээ. Тооны хувьд хамгийн олон хүнийг хамарсан насны бүлэг гэгдэх шинэ мянганыхан тэднээс огт өөр юм. Америкийн хөгжил, цэцэглэлт дэлхий дахинд нөлөөтэй байж, иргэний эрхийн хөдөлгөөн амжилтад хүрч, Вьетнамын дайн хийж байх үед төрсөн төрөлтийн оргил үеийнхэн өөрсдийгөө ноёлох, улс орноо удирдах үеийнхэн гэж бодож ирсэн.
Улс төрийг ялзарсан гэж үзэж, ёс суртахуун шаардаж, тэмцэж ирсэн тэд эхлээд өмнөх үеийнхээ эсрэг соёлын дайн зарлаж, удалгүй өөрсдийн үеийнхэнтэй тэмцэх болсон. Тэд өмнөх үеээсээ илүү олноор дээд сургуульд суралцсан ч цэргийн албыг цөөн тооны хүн хаасан. Залуудаа эсэргүүцэн тэмцэгчид байсан тэд эцэг эх болоод өөрсдийн зөвийг улайран хамгаалагчид болов. Тэд нийгмийн халамж, тэтгэвэр, тэтгэмжийг өөрсдөдөө томоор хутгаж аваад үр хүүхдүүддээ төлөх боломжгүй шахам өрийн дарамтыг засгийн газарт үлдээлээ.
1981-1996 оны хооронд төрсөн шинэ мянганыхан өөр гараг дээр өссөн. Есдүгээр сарын 11-ний халдлага, санхүүгийн хямрал, сургууль дээрх аллага гэх мэтээр улс орныхоо хүч чадал сулрахыг ажиглаж өссөн тэднийг “прагматик идеалистууд” буюу төрөлтийн оргил үеийнхнийг оролцуулалгүйгээр дэлхийг илүү сайн сайхан болгох хүсэлтнүүд гэж тодорхойлдог. Тэд дижитал ертөнцийг төрөлх гэр шигээ мэдэрдэг эхний бөгөөд номын санд судалгааны ажил хийж байснаа санадаг сүүлчийн үеийнхэн юм.
Эцэг эхтэйгээ харьцуулвал тэд улс төрийн намын гишүүнчлэл, харьяалал маш багатай, нийгэмд биеэ авч явах байдал нь тун чөлөөт хүмүүс юм. Мөн өөр арьсны болон ижил хүйсний хүнтэй гэрлэх, марихуан татах эрхээ хуулиар баталгаажуулсан үеийнхэн юм. Тэд арьсны өнгөний хувьд ч олон янз бөгөөд Pew байгууллагын судалгаанаас харахад 56 хувь нь цагаан арьстан байгаа нь төрөлтийн оргил үеийнхний дөрөвний гурав нь цагаан байснаас хамаагүй өндөр байна. Тэд шашны итгэл үнэмшил ч багатай (дараагийн хуудасны дүрсийг үзнэ үү). Тэдний нийгмийг үзэх дэвшилтэт үзэл нь компани, соёлд хүчтэй нөлөөлөөд эхэлсэн. Шинэ мянганыхан бизнесүүдийг орон нутагтаа төвлөрдөг, ногоон, нийгмийн хариуцлагатай байх ёстой гэж үздэг. Тэд заавал хувийн орон сууц, машинтай байх албагүй
