Бид бүгд л ямар нэг зүйлийн нэг хэсэг байхыг үргэлж хүсдэг. Тэр нь сонирхол нийлдэг найз нөхөд, гэр бүл эсвэл улс орон ч байх тохиолдол бий. Ажил дээр ч яг адилхан юм. Судалгаагаар ажлынхаа нэг хэсэг гэдгийг мэдэрдэг ажилтан ажлаа 3.5 дахин илүү бүтээмжтэй хийдэг байна. Хүний ямарваа нэг зүйлд харьяалагдах хэрэгцээний нөлөөг илүү ойлгохын тулд мянган ажилтнаас судалгаа авсан юм.
Уг судалгаагаар нийт судалгаанд оролцсон хүмүүсийн 40 хувь нь ажлын байран дээр ямар нэг байдлаар тусгаарлагдсан мэдрэмж авдаг байна. Үүний шалтгаан нь нас, хүйс болон яс үндсээс болдог аж. Цаашлаад оролцогчдын 62 хувь нь гэртээ, 34 хувь нь ажил дээрээ хамгийн тухтай орчинг мэдэрдэг. Энэхүү судалгааны үр дүнгээр хүмүүс ажлынхантайгаа илүү ойрын харилцаатай байхыг хүсдгийг харуулсан юм. Тэгвэл байгууллагууд ажилтнуудаа хэрхэн нөхөрсөг харилцаатай байлгаж тэднийг илүү гэртээ байгаа мэт мэдрэмж төрүүлэх вэ? Судалгааны дүгнэлтээр санал болгож буй маш энгийн нэг шийдэл бол хамтран ажиллагсадтайгаа яриа өдөж тэднийг зүгээр байгаа эсэхийг асуух боломжийг үүсгэх аж.
Санал асуулгаар 39 хувь нь хамт ажиллагсад нь өөрсдийнх нь сонин сайхныг асууж ярилцах нь тэдэнд элэгсэг, дотно мэдрэмжийг төрүүлдгийг хүлээн зөвшөөрсөн байна. Ердөө л мэндийг нь асууж, аар саар зүйлс ярилцах нь ажлынхантайгаа дотно харилцаа үүсгэх хамгийн үр дүнтэй арга юм. Харин томоохон арга хэмжээнд уригдах, мэйл дээр нэрийг нь дурдах зэрэг нь үр дүн багатай гэдгийг уг судалгаа онцолсон.
Мэнд мэдэх урлаг
Harvard Business Review-ын багийнхан Ernst Young байгууллагад үр дүнтэй харилцааны судалгаа хийжээ. Хүн бүр мэдээж бусадтай харилцах өөрсдийн гэсэн онцлогтой байв. Зарим нь зүгээр л сууж байгаад ярилцахыг илүүд үздэг бол нэг хэсэг нь онлайнаар чатлах зарим нь бүр огт харилцахыг хүсдэггүй байна. Хамт олны уур амьсгалыг эергээр бүрдүүлэхэд хамт ажиллаж байгаа хүмүүстэйгээ хэрхэн зөв харилцахаа мэдэх нь чухал юм.
Харилцаа үүсгэх жижиг боломжийг бүү алд. Ажлын хамт олноо ойлгож хүндэлдэг, тэднийг үнэлдэг гэдгээ харуулах хэрэгтэй. Сониуч бай, тэдэнд анхаарал хандуул. Ялимгүй боломжийг ч гэсэн ашиглаж, сэтгэлээсээ ярилц. “Юу байна даа, туслах зүйл байна уу?” гэх мэт асуулт л харилцааг бүхлээр нь өөрчлөх “ид шидтэй” байдаг.
Аливаа асуудлыг нэг өнцгөөс харах гээд байдгийг сана. Харилцан ярилцах нь тухайн хүний ярьж буй зүйлийг нь ойлгох чармайлт болохоос бус маргах, мэтгэлцэхийн нэр биш юм. Хэрэв ажлын чинь хэн нэгэн ойлгохгүй зүйлс ярьж эхэлвэл дундуур нь тасалж ярианы сэдвийг өөрчлөх хэрэггүй. Оронд нь ойлгохыг хичээж, болохгүй бол дэлгэрэнгүй тайлбарлахыг хүсээрэй. Магадгүй тэдний хариулт таны харах өнцгийг ч өөрчилж болох юм.
Эмзэглэхэд буруудах зүйл байхгүй. Ажлынхнаасаа, ялангуяа өөрөөсөө залуу нэгнээс санаа бодлыг нь асуугаарай. Чи тэдэнд итгэж, тэдний саналыг нь үнэлж байгаагаа харуулах нь харилцаа үүсгэх үр дүнтэй арга юм. Заримдаа тэдний саналыг хүлээж авч, өөрт тохиолдсон бэрхшээлээ нээлттэй ярилцах нь харилцааг илүү амьд болгодог.
Нээлттэй бай. Хүнд үе тохиож, хэцүү зүйлсиaйн талаар ярилцаж байсан ч нээлттэй байх хэрэгтэй. Мөн бусдыг урамшуулах нь харилцаанд ач тустай. Бусдаас хүсэн хүлээдэг зан чанаруудыг өөртөө бий болгох нь хамгийн үр дүнтэй арга юм.
Эдгээр зөвлөгөө таныг ажлын хамт олонтойгоо харилцахад туслах болно. Гэвч байнгын амьд харилцааг үүсгэх нь таниас тууштай зан чанарыг шаардана. Заримдаа илүү хичээл зүтгэл ч гаргах хэрэгтэй болно. Эцсийн эцэст та ажил дээрээ дунджаар амьдралынхаа 13 жил, хоёр сарыг өнгөрөөдөг учраас ажлынхантайгаа утга учиртай харилцааг үүсгээрэй
