Монголд “худалдаа арилжаа” гэдгийг өөрт байгаа бүтээгдэхүүнээ зарах төдийгөөр ойлгох нь элбэг. Харин Японы бизнесийн соёлд “худалдаа арилжаа” гэсэн ойлголт нь харилцан итгэлцэл дээр явагддаг. Худалдаж байгаа болон худалдан авч байгаа аль аль нь бие биедээ итгэсний үндсэн дээр худалдаа хийгддэг. Худалдаж байгаа тал нь чанартай сайн бүтээгдэхүүн борлуулж байгаа гэдгээ хэлж танилцуулж байнгын худалдан авагчтай болохыг хүсдэг. Харин худалдан авагч тал нь олон газраас чанарын баталгаагүй, муу бүтээгдэхүүн авч байхаас нэг найдвартай газраас байнга авч байхыг эрмэлздэг. Ингэснээр хоёр талын хэн хэн нь санаа амар худалдаа хийж, сэтгэл ханамжтай байх болно.
Одоо Монголд урд хөршөөс баталгаагүй хүнсний бүтээгдэхүүн ихээр оруулж ирж худалдаалж байгаа нь бодит байдал. Тэгэхээр чанартай бараа бүтээгдэхүүн худалдаалдаг компани маш чухал. Япончуудын бизнестээ баримталдаг алтан зарчим бий. Японы бизнесмэнүүд нэг удаагийн өндөр ашиг олох бус бага ашиг харж урт удаан хугацаанд түнш болж, бараа бүтээгдэхүүнээ худалдан борлуулах бодлого баримталдаг.
Мөн тухайн компаниас худалдан авагч нар бараа бүтээгдэхүүн худалдан авсан бол худалдан авалтын дараах үйлчилгээг маш сайн хийдэг байх хэрэгтэй гэж үздэг. Аль болохоор худалдан авагчийн сэтгэл ханамжийг өндөр байлгаж чадвал таны бизнес урт удаан хугацаанд оршин тогтноно гэж үздэгтэй холбоотой. Япон компаниуд нь гадны компаниудтай бизнесийн харилцаанд орох үедээ заавал дундаа Японы нэг худалдааны компанийг оруулж гэрээ хэлцэл хийдэг. Энэ нь ямар учиртай вэ гэхээр гадны компанитай харилцахад үл ойлголцол гарвал төвөгтэй учраас Японы компаниуд аль болох зай барих хандлагатай байдаг. Ялангуяа Японы брэнд бүтээгдэхүүн үйлдвэрлэдэг томоохон компаниуд бараа бүтээгдэхүүнээ дотоодын худалдааны компанидаа нийлүүлдэг.Үүний дараа Японы худалдааны компаниас нь бараа бүтээгдэхүүнийг гадны компаниуд худалдан авах боломж бүрддэг. Нөгөө талаар Японы томоохон компаниуд нь гадны компанитай харилцах үед үүсэж болох янз бүрийн хариуцлагаас бас зайлсхийх зорилго агуулж байгаа.
Эх сурвалж: japanguide.mn
9905-7125, 9110-6861, 8010-3508
contact@japanguide.mn
