Монголын хамгийн олон жил тасралтгүй зохион байгуулагдаж буй Playtime олон улсын хөгжмийн наадам долоодугаар сарын 6, 7, 8 -ны өдрүүдэд уламжлал ёсоор “Монгол шилтгээн” -д болох гэж байна. Энэхүү наадам нь зөвхөн хөгжмийн салбар төдийгүй наадам төвтэй бусад урлаг соёлын арга хэмжээ, үзвэр үйлчилгээ, залуусын амьдралын хэв маягт эерэгээр нөлөөлөөд зогсохгүй бизнесийн болоод бусад салбарын хамтрагч байгууллагуудад хөгжим дагасан соёлын боломжийг таниулж, хөгжимд хандах хандлагыг шат шатаар ахиулж байгаа билээ. Тэгвэл энэ удаагийн наадмаар гадаад болон дотоодын 170 хамтлаг, уран бүтээлчид нийт 14 тайзнаас уран бүтээлээ толилуулах юм.
Cigarettes After Sex болон орчин цагийн техно хөгжмийн артистууд
Энэ жилийн наадмын голлох уран бүтээлчид нь indie rock, shoegaze, dream pop урсгалаар тоглодог Америкийн Cigarettes After Sex хамтлаг, мөн орчин цагийн техно хөгжмийн нөлөө бүхий артист Kobosil, Marcel Dettmann нар байх бөгөөд олон улсын 21 хамтлаг, DJ уран бүтээлчдийн 74 хүнтэй бие бүрэлдэхүүн наадамд хүрэлцэн ирнэ. Харин төв тайз буюу Playtime тайзнаа дотоодын уран бүтээлчдийн олон сонирхолтой тоглолт багтжээ. Тухайлбал, энэ жил 45 жилийн ойн баяраа тэмдэглэж буй “Инээмсэглэл” хамтлаг хүндэтгэлийн тоглолтоо үзүүлэх бол дуучин Э.Минжинсор анх удаа амьд хөгжмийн хамтлагтай дуулна. Түүнчлэн 17 жилийн дараа “Шөнийн галт тэрэг”, найман жилийн дараа “Дэлхий” хамтлаг тус тус тайзнаа дахин тоглохоороо онцлог.
80 мянган үзэгч
Энэ жил Playtime наадам 80 мянган үзэгч хүлээн авахаар нарийн зохион байгуулалтын дагуу бэлтгэл ажлаа хангаж байна. Тэд дэлхийн хэмжээний хөгжмийн наадмын стандартыг хангах үүднээс продакшн багтаа олон улсын мэргэжилтнүүдтэй хамтран ажилласаар ирсэн билээ. Тодруулбал, 2013 оноос тайзны дуугаралт дээр хамтарч буй ITC solution компани энэ жил БНСУ -аас есөн инженер урьж ажиллуулах бол “Наагхилац” тайзны visual болон гэрлийн мэргэжилтнээр Нидерландын уран бүтээлчид хоёр дахь жилдээ ажиллах юм. Үүний зэрэгцээ хамгийн отгон тайзуудын нэг болох Streetz stage –ээр дамжуулан Монголд хип хоп урлаг үүсэж хөгжсөний 50 жилийн ойн хүрээнд хөгжмийн хөтөлбөрөөс гадна гудамжны урлагийн бусад төрлийг багтаасан сонирхолтой хөтөлбөр бэлтгэж байна.
Ногоон хөгжлийн төлөө
Earth. Music. Love уриан дор хөгжмөөр дамжуулан залууст эерэг хандлага түгээж, ногоон хөгжилд уриалдаг Playtime наадам энэ чиглэлээр бодитой хувь нэмрээ оруулж чаддаг. Тухайлбал, наадмын бүх хог хаягдал ангилагдаж, цааш дахин боловсруулагдахын зэрэгцээ наадмын талбайг “эко” аргаар усалж, дахин ашиглах боломжтой хаягжилт хийн, цаасан хэвлэлээс аль болох татгалзсаар байна. Мөн Playtime –ийн тасалбарыг Shoppy болон наадмын албан ёсны апп Toki зэрэг дижитал шийдлийн тусламжтай худалдаалж байгаа нь маш амжилттай хэрэгжиж буй. Мөн уламжлал ёсоор наадмыг зорих автомашины тоог бууруулах зорилгоор Улаанбаатар хотод тодорхой зогсоолоос үнэгүй автобус болон UBCab үйлчилгээг хүргэх юм.
2027 онд Азийн топ хөгжмийн наадмуудын нэг болно
2027 он гэхэд Playtime наадам Азийн топ таван хөгжмийн фестивалийн нэг болох зорилготой бөгөөд энэ жилийн тухайд 3000 гаруй ажлын байр бий болгож, соёлын бүтээлч үйлдвэрлэлийн салбарт эдийн засгийн бодит хувь нэмэр оруулж байна. Мөн наадмын бас нэгэн чухал хэсэг болох хөгжмийн бус “PT+ хөтөлбөр” нь дотроо хувь хүний хөгжил, эрүүл амьдралын хэв маяг, сэтгэл зүйн эрүүл мэнд, гар урлал зэрэг төрөл бүрийн хөтөлбөрийг багтааж, 200 гаруй уран бүтээлч, оролцогчийн хамтын оролцоотойгоор наадмын гурван өдрийн турш зохиогдох юм. Энэ жилийн тухайд Kids zone -д хүүхдэд зориулсан тусгай хөтөлбөрүүдийг зохион байгуулж, хүүхдийн ариун цэврийн өрөө, хүүхдийн хоолны асрууд мөн ажиллана гэдгийг онцолж байна.
