Монголын Эдийн засгийн чуулганы хоёр дахь өдрийн хуралдааныг Монгол Улсын Шадар сайд бөгөөд Эдийн засаг, хөгжлийн сайд Ч.Хүрэлбаатар эхлүүлж, Монгол Улсын эдийн засгийн нөхцөл байдал, хөрөнгө оруулалтын орчин, бизнес эрхлэх боломжуудын талаар үндсэн илтгэлдээ танилцууллаа. Тэрбээр Монголын эдийн засгийн чуулганы гол зорилго нь гадаадын хөрөнгө оруулалтыг эрчимжүүлэхэд чиглэж байгааг онцлоод уул уурхайгаас бусад талбарт, тэр дундаа банк санхүү, сэргээгдэх эрчим хүч, аялал жуулчлал, тээвэр логистик, чөлөөт бүсэд хөрөнгө оруулахад нээлттэй, монголчууд бэлэн байна хэмээн чуулганы индрээс мэдэгдлээ.
Мөн гадаадын хөрөнгө оруулагчдад хандсан илтгэлдээ Эдийн засаг, хөгжлийн сайд Ч.Хүрэлбаатар Монгол Улсын эдийн засгийн талаар анхаарал татах хэд хэдэн сонирхолтой баримтыг дурдсан юм. Тухайлбал:
- Монгол Улсын эдийн засаг 16.8 тэрбум ам.доллароор хэмжигдэж байгаа бөгөөд ДНБ-ий хэмжээгээр 196 орноос 124-т эрэмбэлэгдэж байна.
- Энэ онд нэг хүнд ногдох ДНБ 5033 ам.долларт хүрсэн нь 196 орноос 119-т эрэмбэлэгдэх үзүүлэлт юм.
- 2012-2022 оны хооронд Монгол Улсын эдийн засгийн өсөлт дунджаар 5.1 хувь байгаа нь 196 орноос 11-т эрэмбэлэгдэх үзүүлэлт болж байна. Өөрөөр хэлбэл, Монгол Улсын эдийн засаг бусад улстай харьцуулахад харьцангуй хурдтай тэлж байгаа нь бизнесийн талбарт үр ашигтай ажиллах нөөц боломж нээлттэй байгааг илтгэж байна.
- Өнгөрсөн онд экспортын орлого 12.5 тэрбум ам.доллар буюу түүхэн дээд хэмжээндээ хүрсэн. Мөн экспортын орлогоороо 196 орноос 102-т эрэмбэлэгдэж байна.
- Цар тахлын жилүүдэд макро эдийн засгийн үзүүлэлтүүд тааруу байсан ч оргил үедээ 16.2 хувьд хүрээд байсан инфляцын түвшин өнөөг хүртэл тогтвортой буурч байна. Мөн цар тахлын үед 3 тэрбум ам.доллараас буугаад байсан гадаад валютын нөөц хэвийн хэмжээндээ орж, одоогоор 3.8 тэрбум ам.долларт хүрээд байна.
- Цар тахал, дэлхий нийтийг хамарсан геополитикийн хямарлаас шалтгаалан улс орнуудын эдийн засаг сорилттой тулгарч байгаа ч Монгол Улс гадаад өр төлбөрөө цаг тухайд нь төлж, зээлжих зэрэглэлээ хэвээр хадгалсаар байна.
Эдийн засаг, хөгжлийн сайд Ч.Хүрэлбаатар Монгол Улсын эдийн засгийн нөхцөл байдлыг тоймлон танилцуулах үеэрээ монголчууд гадаадын хөрөнгө оруулагчидтай хамтран урагшлахад бүх талаар бэлэн байгаагаа онцлон дурдсан. Мөн хөрөнгө оруулагчдад бизнесийн таатай боломжуудыг нээж өгөх үүднээс Хөрөнгө оруулалтын тухай хуульд хөрөнгө оруулагчийг хамгаалах, гомдол маргааныг цаг алдалгүй шийдвэрлэх, тусгай зөвшөөрөлтэй холбоотой хүнд суртлыг бууруулахад салбарын яамны зүгээс бүхий л талаар анхаарч, хуулийн төсөл боловсруулснаа мэдэгдсэн. Хуулийн төслийг ирэх намрын чуулганаар хэлэлцүүлнэ гэдгийг тэрээр мөн тодотгож байсан.
Түүнчлэн гадаадын хөрөнгө оруулагчдыг татварын бодлогоор дэмжинэ гэдгээ салбарын сайдын хувиар онцолж байсан юм. “Монгол Улсын хувьд, татварын ачаалал, дарамт харьцангуй бага улсад тооцогддог. Энэ үзүүлэлтээр 211 орноос сүүлээсээ 33-т эрэмбэлэгдэж байгаа нь татварын дарамтгүй улс болохыг илтгэж байна” хэмээн Эдийн засаг, хөгжлийн сайд Ч.Хүрэлбаатар танилцуулж байв.
Мөн тэрбээр хөрөнгө оруулалтын урсгал голчлон чиглэдэг уул уурхайн талбарт зэс, нүүрснээс гадна газрын ховор элемент шинэ боломж дагуулж, хөрөнгө оруулалтын хамгийн эрэлттэй талбар болж байгааг онцолсон. Түүний илтгэлд манай улсын эрдэс баялгийн салбарт хэр хэмжээний потенциал байгаа талаар тоо баримтууд дурдагдсан нь мөн анхаарал татаж байлаа.
Тухайлбал, эдийн засгийн ачааны хүндийг үүрч байгаа зэсийн салбарт дэлхийд тэргүүлэх хэмжээний нөөц байна гэсэн юм. Одоогоор зэсийн батлагдсан нөөц 69.9 сая тонн бөгөөд энэ нөөцөөрөө Монгол Улс дэлхийд эхний 10-т эрэмбэлэгдэж байна. Харин нүүрсний батлагдсан нөөц 33.4 тэрбум тонн бол төмрийн хүдрийн батлагдсан нөөц 1.84 тэрбум тонн байна. Инфляцыг сөрөгч үнэт металл болох алтны батлагдсан нөөц 448.1 тонн байгаа бол 192 мян.тонн ураны нөөц, 332 сая тонн газрын тосны нөөц байгааг Эдийн засаг, хөгжлийн сайд Ч.Хүрэлбаатар онцолж байв.
