Монголын интернэт сүлжээ, мэдээлэл технологийн мэргэжилтэн залуучууд нэгдэж ашгийн төлөө бус “mnNOG” мэргэжлийн холбоог байгуулан 5 дахь жилийн нүүрийг үзэж байна.
Энэ удаагийн mnNOG5 арга хэмжээ нь 2023 оны есдүгээр сарын 18-д Улаанбаатар хотноо болох форум уулзалт болон 5 өдрийн сургалтуудаас бүрдэж байгаа болно.
Форумын талаарх дэлгэрэнгүй мэдээллийг www.nog.mn вэбсайтаас болон https://www.facebook.com/nog.mn хуудсаас харах боломжтой. Форумын бүртгэл эхэлснийг та бүхэнд дуулгахад таатай байна.
“mnNOG” (Mongolian Network Operators’ Group) нь сүлжээний инженер, техникийн мэргэжилтнүүдийг сүлжээ, аюулгүй байдал болоод интернэт сүлжээний бусад технологиудын талаар сургалт болон мэдлэг туршлага солилцох үйл ажиллагаагаар хангах зорилготойгоор мэдээллийн технологи, харилцаа холбооны салбарын мэргэжилтнүүдийн байгуулсан ашгийн төлөө бус нэгдэл юм.
Австрали, Япон, Сингапур, Энэтхэг, Бутан зэрэг Ази Номхон далайн бүсийн болон дэлхийн ихэнх улс орны NOG (network operators group)-ууд дунджаар 10 гаруй жилийн өмнөөс үйл ажиллагаагаа явуулан мэргэжилтнүүдийнхээ ур чадварыг нэмэгдүүлэх замаар салбарынхаа хөгжлийг дэмждэг ажээ.
2023 оны “mnNOG5” арга хэмжээг интернэт сүлжээ болон үүрэн телефоны тэргүүлэх үйлчилгээ эрхлэгч, мэдээллийн технологийн чиглэлийн их дээд сургууль, эрдэм шинжилгээ боловсролын сүлжээний төв, контент хөгжүүлэгч компаниудын дэмжлэгтэй, өргөн цар хүрээтэй зохион байгуулж байна.
Мөн монгол инженерүүд APNIC, NSRC зэрэг олон улсын интернэтийн судалгаа, мэдээллийн төвүүдийн мэргэжилтнүүдтэй нягт хамтарч ажиллаж байгаа бөгөөд энэ нь “mnNOG” форумын гол зорилтууд болох салбарынхаа боловсон хүчний мэдлэг туршлагыг нэмэгдүүлэх, гадаад орнуудын инженер мэргэжилтнүүдтэй хамтарч ажиллах бодит боломжуудаар хангаж дэмжихэд тогтвортой түлхэц болох юм.
Цаашлаад сургалт, уулзалтууд зохион байгуулахдаа олон улсын болон дотоодын өндөр туршлага, мэдлэгтэй мэргэжилтнүүдийг урин оролцуулж, тэдний тэргүүн туршлагууд, сүүлийн үеийн шинэлэг мэдлэг мэдээллийг Монгол инженер мэргэжилтнүүддээ хүргэхийг зорин ажиллаж байна. Мөн “mnNOG” форум нь дотоод гадаадын интернэт сүлжээ, контент үйлдвэрлэгч компаниудын хоорондоо уулзах, хамтарч ажиллах бас нэгэн боломж байх болно гэдэгт итгэлтэй байна.
