Бизнесийн өсөлтөд юу хамгийн чухал вэ?
Стратеги, алсын хараа, бизнес төлөвлөгөө, хууль эрхзүйн орчин, татвар, хүний нөөц гээд хүн бүр өөр хариулт өгөх боломжтой. Эдийн засгийг нуруундаа үүрч яваа бизнес эрхлэгчид өөр өөр асуудалтай нүүр тулж яваа болохоор тэр. Мөнгөтэй хүн л бизнес хийдэг, мөнгөтэй хүн ямар ч асуудалгүй гэж ойлгох нь өрөөсгөл. Ялангуяа өөрийн бизнесээ босгох гээд бүхнийг тэгээс эхэлж, хувь, хувьсгалын олон асуудалтайгаа нүүр тулж яваа жижиг дунд бизнес эрхлэгчид маш олон бий. Тэдэнд мөнгөөр үнэлэгдэхгүй, санхүүгийн бус дэмжлэг үгүйлэгдсээр байна. Тиймээс бизнес эрхлэгчдийн зовлон жаргал, амжилт бүтээлийг хуваалцаж ирсэн “Бизнес.мн” платформоос 5 жилийнхээ ойн хүрээнд “Бизнес цэнэг” сургалт, хэлэлцүүлгийг хоёр дахь удаа зохион байгуулахаар болсон юм. Энэ удаагийн сургалт хэлэлцүүлгээр бид бизнес эрхлэгчдэд бизнесээ бүтэн зургаар нь, аль болох 360 харж, өөр өөрсдийн асуудалдаа шийдэл олоосой гэж хүсч байна.
“Бизнес цэнэг” арга хэмжээний үеэр тавих зарим илтгэлийн агуулгаас сонирхуулбал:
“Обзерв консалтинг” ЗҮБ-ын үүсгэн байгуулагч Д.Отгонбат:
“Чанар бол бизнес удирдаж яваа бүх л хүний анхаарлаа хандуулах сэдвийн нэг зайлшгүй мөн. Өнөөдөр чанарын тухай ойлголт 4.0 болж өргөжсөн. Үүнээс өмнөх үеүдэд бүтээгдэхүүн үйлчилгээний чанар, процессийн чанар гэдэг ойлголтууд чухал байсан бол одоо байгууллагын өөрийнх нь чанар, дээрээс нь технологийн чанар, бас хүмүүсийн чанар гэдэг ойлголтууд гарч ирсэн. Тэр дундаа хүний мөн чанар, хувь хүний чанар маш чухал болоод байна”.
“Могул” группийн ерөнхийлөгч Н.Баттулга:
“XXI зуун гарсаар хүн төрөлхтний түүхэн дэх нэгэн том хөгжлийн үе тохиож байгаа ба үүнийг Цахим зуун буюу Дижитал эрин хэмээн нэрийдэх болжээ. Технологийн эрчтэй хөгжлийн үр дүнд хүн бүхэн харилцаа холбоотой болохоос гадна хүн-машин, бүр цаашлаад машин хоорондоо холбогдох болж мэдээллийн асар том давалгаа үүсгэх болов. Технологийн энэхүү хөгжил нь хүмүүний ердийн хэрэглээнд хувьсгал авчрахаас гадна бизнес хийх уламжлалт арга зүй, тогтолцоо, загварт ч онцгой эерэг өөрчлөлтүүд авчирч, бүтээмжийн урьд хожид байгаагүй цоо шинэ төлөвийг үүсгэж байна”.
Хүний нөөцийн судалгааны хүрээлэнгийн захирал Г.Тэгшбүрэн:
“Хүний нөөцийн менежерүүдэд тулгамдаж буй гол асуудал нь дэлхий дээр коронагийн өмнөх үе, коронагийн хойдох үе гэж хоёр үе гарч ирчихээд байна. Коронагаас хойш хүний нөөцийн менежерүүдэд тулгамдаж буй гол асуудал бол хүний нөөцийн эргэц хөдөлгөөн, хүний нөөцийн ур чадварын хомсдол гэсэн хоёр асуудал юм.
Хүний нөөцийн менежментийн маш том хувьсал бол “Байгууллага ийм л байна, чи олон таван юм ярилгүй ирээд энийг хий, ийм орчинд чи дас” гэдэг хандлага өөрчлөгдсөн. Та юу хүсч байна, байгууллага тухайн хүний хүссэнээр ажлыг нь зохион байгуулж өгөх, удирдлагын эв дүйг гаргах, хүссэн менежментийн багийн ажиллагааг зохион байгуулах гэх зэрэгт анхаарал хандуулах, нэг ёсондоо employ experience гэдэг ойлголт гарч ирээд байна”.
“Хархорум дижитал” академийн үүсгэн байгуулагч Д.Энхбат:
“Ямар ч хүн өөрийн бизнесээ эхэлж байхдаа ажилдаа бүрэн уяагдсан, цаг завгүй, өдөр бүр ундрах олон асуудлаас болж байнга санаа зовсон амьдралтай болно гэж мөрөөддөггүй. Харин ч, ашиг орлого сайтай бизнестэй болж, хүссэн цагтаа ажиллаж, хүссэн цагтаа амарч, илүү эрх чөлөөтэй явахыг хүсдэг. Дуртай, сонирхолтой зүйлстээ цаг заваа зориулна гэж мөрөөддөг.
Гэтэл бодит амьдралд байдал өөрөөр эргэх нь элбэг. Ажил дээрээ хонох шахаж, амралтын өдрөөр ч ажлаа бодно. Байнга шахаж шаардаж байхгүй бол төлөвлөсөн ажил цагтаа дуусахгүй, ажилтнуудын хариуцлага сул, тиймд өөрөө бүх ажилд оролцож, диспетчер мэт явна. Асуудал нэг бүрийг өөрөө хянаж шийдвэрлэнэ. Бизнес амжилттай явж, өсч томрохын хэрээр улам их ажилтай, улам завгүй болно. Нэг мэдэхэд, өөрийн байгуулсан бизнесийнхээ амрах, зогсох эрхгүй нэгэн “эрэг шураг” болж хувирна.
Энэ нь бизнес эрхлэгч хүний ердийн амьдрал уу? Үгүй. Хэрэв ийм дүр зураг харагдаж байгаа бол бизнес эрхлэгч хүн бизнесээ буруу авч явж байна гэсэн үг. Энэ бол бизнес гэж чухам юу вэ гэдгийг буруу ойлгож, өөртөө буруу зорилго тавьж, цаг, хүчээ буруу чигт зарцуулсаар яваагийн илрэл юм. Бизнес бол ажлын байр биш систем юм. Бизнес эрхлэгч хүн бизнесийнхээ системийг байгуулалгүйгээр зөвхөн их ажиллаж, шургуу зүтгэснээр амжилтад хүрэхгүй. Хүссэн эрх чөлөөт амьдралаа олж авч чадахгүй. Тиймээс бизнесээ системчлэх хэрэгтэй”.
Холбоо барих утас: 96216070
Хэлэлцүүлэг №1: Дижитал эриний стратеги
Хэлэлцүүлэг №2: Шинэ үеийн CEO байх нь
