Улаанбаатар хотын нэрээр нэрлэгдсэн Монголын анхны хувийн бирж болох Улаанбаатар Үнэт цаасны биржийн үйл ажиллагаа саяхнаас идэвхжээд байна. 2015 онд анх арилжаа, тооцооны тусгай зөвшөөрлөө авч үйл ажиллагаагаа эхлүүлж байсан тус бирж нь байгуулагдсан цагаасаа эхлэн үйл ажиллагаагаа тасралтгүй сайжруулж, олон улсын туршлагуудаас судалж ирсэн. Харин тун саяхан олон улсын хөрөнгийн зах зээлд хүчтэй дэлгэрч буй ETF төрлийн бүтээгдэхүүнийг арилжаалж эхлэлээ. Тодруулбал олон улсын тэргүүлэх хөрөнгийн бирж Насдак бирж дээр арилжаалдаг 101 хувьцааны багцад нэг худалдан авалтаар, монгол төгрөгөөр шимтгэл хураамжийн таатай нөхцөлтэйгөөр хөрөнгө оруулах боломжийг олгож буй юм.
Тус биржийн арилжаа нь 09:00-16:00 цагийн хооронд явагддаг бөгөөд арилжааны хувилбар, үйлчилгээ, шимтгэл хураамжийн нөхцөлөөрөө уламжлалт биржээс ялгарч, хөрөнгийн зах зээлийн өрсөлдөөнийг нэмэгдүүлж буй юм. Монгол улсад хувийн биржийн үйл ажиллагаа идэвхэжсэнээр хөрөнгийн зах зээлийн хөгжилд чухал нөлөөтэй гэж салбарын мэргэжилтнүүд үзэж байна. Түүнчлэн үндэсний цахим дэд бүтцийг цогцлоохоор ажиллаж байгаа “Мост Финтек” ХХК IPO-ны анхдагч зах зээлийн арилжаа нь 12 дугаар сарын 1-7-ны өдөр тус биржээр явагдаж дараа дараагийн олон IPO-ны эхлэл болох юм. Одоогоор 27 үнэт цаасны компани тус биржид гишүүнээр элсээд буй тул арилжаанд харилцагч брокероороо дамжуулан одоогийн Үнэт цаасны төвлөрсөн хадгаламжийн дансаараа оролцох боломжтой юм.
