Монголын хамгийн анхны цэцгийн фестиваль 6 сарын 8, 9-нд Мишээл вокинг стрийтэд болох юм. Тус фестивалийн ерөнхий зохион байгуулагчаар “Ойм ногоон урлан” ХХК ажиллаж байна. Ойм ногоон урлангийн хувьд зөвхөн цэцэг, ургамлын худалдаа эрхлээд зогсохгүй цэцгийн соёлыг түгээн дэлгэрүүлэхээр нийгэмд чиглэсэн олон ажил хийдэг байна. Үүний нэг нь тун удахгүй болох гэж буй “Flower Festival Mongolia” -2024 юм. Цэцэг ургамлын ач холбогдол хийгээд Flower festival арга хэмжээний талаар “Ойм ногоон урлан” ХХК-ийн гүйцэтгэх захирал Б.Одгэрэлтэй ярилцлаа.
Сайн байна уу?. Танд энэ өдрийн мэнд хүргэе. “Ойм ногоон урлан” үйл ажиллагаа явуулаад хэдэн жил болж байна. Яагаад цэцэг ургамлын салбарыг сонгосон бэ?
Ойм ногоон урлан нь цэцэг, ургамлын соёлыг түгээн дэлгэрүүлэхээр үйл ажиллагаагаа явуулаад 6 жил болж байна. Цэцэг, ургамалд дуртай хүмүүсийн тоог нэмэгдүүлэх, энэ салбарынхаа нэр хүндийг өсгөх, үүгээрээ дамжуулан уур амьсгалын өөрчлөлтөд эерэг нөлөө үзүүлэх нь бидний зорилго. Ургамал нь өөрөө хүний анхдагч хэрэгцээний нэг. Ургамлаар дамжуулан агаарын бохирдлыг бууруулж, хүчил төрөгчийг үйлдвэрлэх боломжтой. Тиймээс хүн бүрийн амьдралын чанарыг дээшлүүлэхэд хамгийн их хувь нэмэр оруулдаг учраас ургамлын соёлыг Монголдоо түгээн дэлгэрүүлэхээр энэ салбарыг сонгон ажилладаг даа.
Цэцэг ургамлын ач тусын талаар, тэр дундаа хүүхэд цэцэг ургамалтай ойр өсөхийн эерэг нөлөө нь юу вэ?
Ургамал нь өөрөө хүчил төрөгч үйлдвэрлэхээс гадна маш олон ашиг тусыг бидэнд өгч байдаг. Стресс тайлах, бүтээмж нэмэгдүүлэх, орчны үзэмжтэй болгох гээд дурьдаад байвал олон ач тус бий. Тэр дундаа хүүхэд багаасаа цэцэг ургамал тарьж, ургуулж, арчилснаар эх дэлхий, байгалиа хайрлах, экологийн боловсролд суралца, сэтгэл санааг тайвшруулах зэрэг олон эерэг нөлөө бий.
Ойм ногоон урлан санаачлан Монголдоо анх удаа Flower Festival зохион байгуулах гэж байна. Энэ фестивалийг яагаад зохион байгуулах болсон талаар хуваалцвал?
Өмнөх жилүүдэд цэцэг, ургамал сонирхогчдод зориулсан фестиваль болж байгаагүй, үзэсгэлэн худалдаа л болдог байсан. Харин энэ удаад бид олон нийтэд ургамлын соёлыг түгээн дэлгэрүүлэх, нийгмийн стрессийг бууруулах, ургамлаар дамжуулж байгаль ээлтэй амьдралын хэв маягийг түгээх, салбарын нийт хүндийг өсгөх зорилгоор Монголдоо анх удаа цэцгийн фестиваль хийх санааг гаргасан. Энэхүү санааг ажил хэрэг болоход Мишээл вокинг стрийт дэмжлэг үзүүлж Flower Festival-2024 арга хэмжээг хамтран зохион байгуулахаар ажиллаж байна. Манай салбарыг дэмжиж, хүн бүрд ургамлын соёлыг түгээн дэлгэрүүлэх үйл хэрэгт том хувь нэмэр оруулж, нийгэмд эерэг давалгаа үүсгэхэд дэмжин ажиллаж байгаад Мишээл вокинг стрийтийн хамт олонд талархаж байгаагаа илэрхийлье.
Цэцгийн фестивальд онцлох ямар арга хэмжээ, сургалт төлөвлөсөн талаар хуваалцвал?
Фестивальд бүх төрлийн баглаа цэцэг, таримал цэцэг, ургамал, ургамлан тохижилтын чиглэлээр үйл ажиллагаа явуулдаг аж ахуй нэгжүүдийн 1500 гаруй нэр төрлийн бүтээгдэхүүн 50% хүртэл хямдралтай үнээр худалдаалагдана. Үүнээс гадна
- Хатаасан цэцэг буюу хербариумын сургалт
- Бяцхан цэцэгчин буюу хүүхдэд экологийн боловсрол олгор цэцэг тарих сургалт
- Хүн бүрт гоё мэдрэмж өгөх Терариумны сургалт.
- Керамик шавар ваар хийх ваар будах сургалт.
- Нэг ч мод тайрахгүйгээр цаас хийх буюу аргал болон жийнсээр цаас хийх сургалт гэх зэрэг олон сургалт хийхээр төлөвлөсөн байна.
Мөн 2 өдрийн турш өдөр бүр 10 азтаныг маш гоё бэлгээр урамшуулах ийм өдөрлөг болно.
Энэхүү фестивалийг жил бүр уламжлал болгон зохион байгуулах уу?
Мэдээж тэгэлгүй яахав… Цаашид энэ фестивалийг жил бүр улам өргөжүүлэн зохион байгуулах, олон байгууллага, хувь хүмүүсийг нэгтгэх, цэцэг ургамлаар дамжуулан нийгэмд эерэг мессеж, эерэг хандлагыг түгээн дэлгэрүүлэхээр Ойм ногоон урлангийн хамт олон ажиллах болно. Иймд цэцэг, ургамалд дуртай хүн бүрийн “Flower Festival Mongolia”-2024-д хүрэлцэн ирэхийг урьж байна.
Фестивалийн талаарх мэдээлэл:
https://www.facebook.com/events/771560145161254
Хугацаа: 2024.06.08-2024.06.09
Цагийн хуваарь: 10:00-20:00
Байршил: Хан-Уул дүүрэг, 2-р хороо, Мишээл экспогийн залгаа Мишээл вокинг стрийт дотор
Имэйл: generalmanager-mws@misheelgroup.mn
Хураамж: Үнэ төлбөргүй
Мэдээлэл авах утас: 99907392, 96023777