Жил бүрийн арваннэгдүгээр сар онлайн худалдан авагчдын дунд хүлээлттэй, хямдралын хамгийн оргил үе болдог. Ирэх сар дэлхийн томоохон худалдааны арга хэмжээнүүдээр дүүрэн байдаг тул хүмүүс хүссэн бараагаа хамгийн хямд үнээр авах алтан үе юм. Эдгээр өдрүүдэд худалдан авагчид зөвхөн хямд бараа төдийгүй сүүлийн үеийн шинэ технологи, хувцас загварын бүтээгдэхүүнүүдийг өрсөлдөөнт үнээр авах боломжтой.
Хямдралын энэ оргил үе ирэхээс өмнө та юу сонирхож, юуг худалдан авах төлөвлөгөөтэй байна вэ? Таны анхаарлыг татсан хямдрал юу болохыг олж мэдээд, хэрхэн хэмнэлттэй үнээр худалдан авалт хийхээ төлөвлөөрэй.
1. Singles’ Day буюу Ганц биечүүдийн өдөр
Огноо: Арваннэгдүгээр сарын 11-нд болно.
Гарал үүсэл: Хятад
Онцлог: Ганц биечүүдийн өдөр нь дэлхийн томоохон онлайн худалдааны өдөрлөгүүдийн нэг бөгөөд Хятадын Alibaba группийн зохион байгуулдаг гол арга хэмжээ юм. Хятад болон олон улсын AliExpress, JD.com гэх мэт онлайн дэлгүүрт хувцас, электроник, гэр ахуйн бараа зэрэг бүх төрлийн бүтээгдэхүүн цочир хямдардаг.
2. Хар баасан гараг
Огноо: Ирэх сарын сүүлийн баасан гараг буюу 29-нд болно.
Гарал үүсэл: АНУ
Онцлог: Уг хямдрал нь “Талархлын баяр”-ын дараа болдог. Amazon, Walmart, Best Buy, Target зэрэг томоохон дэлгүүр асар их хямдралыг танд санал болгох болно. Тодруулбал, электроник бараа, хувцас, гоёл чимэглэл, тоглоом, гэр ахуйн хэрэгсэл голчлон хямдардаг.
3. Cyber Monday
Огноо: Арваннэгдүгээр сарын сүүлийн даваа гарагт болно.
Гарал үүсэл: АНУ
Онцлог: Тус хямдрал нь онлайн худалдаанд илүүтэй төвлөрдөг онцлогтой. Amazon, eBay, Newegg зэрэг цахим худалдааны томоохон платформ электроник, хувцас, гэр ахуйн хэрэгсэл, гоёл чимэглэл гэх мэт өргөн хүрээний бүтээгдэхүүнээ түлхүү хямдруулдаг.
4. Small Business Saturday
Огноо: Арваннэгдүгээр сарын сүүлийн бямба гараг буюу энэ сарын 30-нд болно.
Гарал үүсэл: АНУ
Онцлог: Тус хямдрал нь жижиг бизнесүүдийг дэмжих зорилготойгоор АНУ-д эхэлсэн бөгөөд Black Friday-ийн дараа жижиг дэлгүүрүүд, орон нутгийн бизнесүүд өөрсдийн бүтээгдэхүүнд хямдрал зарлаж, худалдан авагчдыг татдаг. Хувцас, гар урлал, жижиг ахуйн бараа зэрэг өргөн хэрэглээний бүтээгдэхүүнүүд багтана.
5. Thanksgiving Day Sales
Огноо: Арваннэгдүгээр сарын сүүлчийн пүрэв гараг буюу энэ сарын 28-нд болно.
Гарал үүсэл: АНУ
Онцлог: Зарим томоохон дэлгүүр “Талархлын баярын өдөр” буюу Thanksgiving Day-д хямдралаа эрт эхлүүлж, Black Friday-ийн өмнө хэдэн цагийн дотор хямдрал зарладаг. Энэ өдөр Target, Walmart, Best Buy зэрэг томоохон сүлжээ дэлгүүр бүтээгдэхүүнүүдээ хямдруулж эхэлдэг.
