Монголын самарын кластер НҮТББ Байгаль орчин, уур амьсгалын өөрчлөлтийн яамтай байгалийн унаган төрхийг хадгалах, эко системийг хамгаалах, байгалийн нөөцийн тогтвортой менежментийг хэрэгжүүлэх зэрэг өргөн хүрээнд хамтран ажиллахаар санамж бичигт гарын үсэг зурлаа.
Энэхүү санамж бичгийн хүрээнд дараах чиглэлээр хамтран ажиллах юм.
Үүнд:
- Монгол Улсын ойн сан нэн ялангуяа хуш модны нөөц тархцад судалгаа хийж цаашид хууль тогтоомжийн хүрээнд хуш модон ойг хамгаалах, нөхөн сэргээх, нөөцийг нэмэгдүүлэхэд чиглэсэн төлөвлөгөө боловсруулж хэрэгжүүлэхэд хамтран ажиллана.,
- Самрын аж ахуй эрхлэгчдийг Монгол Улсын Ойн тухай хууль болон холбогдох бусад хууль, журам, стандартыг дагаж мөрдүүлэх, үйл ажиллагаа нь хууль тогтоомжид нийцэж байгаа эсэхэд хяналт тавих.,
- Хуш модноос самар бэлтгэх байгальд ээлтэй байдлаар бэлтгэх судалгааг хамтран хийж шинэ технологи нэвтрүүлэх судалгаа хийх.,
- Уул уурхайн бус бүтээгдэхүүний экспортын эрх зүйн орчны талаар судалгаа хийх, тулгамдаж буй асуудлыг тодорхойлох.,
- Олон улсад дагаж мөрддөг стандарт шаардлагуудыг биелүүлж, улирлаас үл хамаарах тогтмол үйл ажиллагааны ажлын байр бий болгох чиглэлээр хамтран ажиллах.,
- Олон улсын стандартад нийцсэн, хүний эрүүл мэнд, байгаль экологид ээлтэй үйлдвэрлэл эрхлэх судалгаа хийх гэх чиглэлд Байгаль орчин, уур амьсгалын өөрчлөлтийн яамтай нэг жилийн хугацаанд хамтран ажиллах аж.
Санамж бичгийн ажлын үр дүнд дэлхийн хуш модон ойн 2 хувийг бүрдүүлж буй манай улсын хуш модны ойд эерэг нөлөөтэй юм. Түүнчлэн хуш модны самрыг борлуулагч иргэд болц нь гүйцээгүй саруудад ойд отоглон бүгж, бэлтгэх үйл явцыг халж, ээлтэй орчин үеийн технологийг нэвтрүүлэх зэрэг ойн салбарыг хамгаалах, арчлах, ургуулах ажилд төр, аж ахуй нэгж, иргэдийг татан оролцуулж буй зэрэг ач холбогдолтой юм байна. Энэ мэт жишгээр уул уурхайн бус баялгийн нөөцийг хамгаалах, төрөлжүүлэх, нөхөн сэргээж, экспортын орлогот эерэг тоон үзүүлэлтийг авчрах бүрэн боломж байгаа юм. Нэг үгээр, эко менежмент, инновацын бодлого нь ирээдүйд үр өгөөжөө нэн хүртээмжтэй өгөх аж.
