Монголын үндэсний уламжлалт уран хатгамлын урлагийг өвлөн, хойч үедээ залгамжлуулах үйл хэрэгт амьдралынхаа 33 жилийг зориулсаар ирсэн соёлын биет бус өв тээгч С.Ганцэцэг дөрөв дэх үеийн уран хатгамалч юм.
Тэрбээр зүү ороох, загасан нуруу хатгамал, зоос ширээний сүлжмэл зэрэг уран шаглааны олон төрлийг залуу үеийнхэнд заан сургаж, үнэт өвийг хамгаалан авч үлдэх, түгээн дэлгэрүүлэх ажлыг хийж буй. Өдгөө С.Ганцэцэг Монголын үндэсний уламжлалт уран хатгамалчдын холбооны тэргүүн, Хүүхдийн урлан бүтээх төвд багшаар ажиллан өөр шигээ өв соёл тээгч болсон уран гартай олон арван шавь нарыг бэлтгээд байна.
Өв тээсэн 33 жил
Дөрөв дэх үеийн уран хатгамалч болох С.Ганцэцэг бага наснаасаа л утас зүүтэй нөхөрлөсөн. Түүний хувьд ээжийнхээ талаас өвлөсөн унаган авьяасаа хөгжүүлсээр уран хатгамлын 10 гаруй төрлийг сурчээ. Багаасаа л сурч мэдсэн бүх зүйлээ хүмүүст заах дуртай байсан С.Ганцэцэг арван жилийн сурагч байхдаа найз нөхөд, багш нартаа зүү ороох хатгамлаар даалин хийхийг заасаар ирсэн. Ингэх явцдаа түүний уран хатгамлын чадвар сайжирч, түүндээ улам дурлах болжээ.
Түүний энэ сонирхол нь өнөөдрийн хийх ажлынх нь эхлэл болсон байна. Тэрбээр Монголын эмэгтэйчүүдийн холбоонд гүйцэтгэх захирлаар ажилладаг байсан хэдий ч түүний сэтгэл уран хатгамалд хүчтэй татагдсанаар ажлаасаа гарч, 2019 онд Хүүхдийн урлан бүтээх төвд анхны уран хатгамлын ангийг нээж, багшлах болов.
Энэ цагаас хойш тус төвд үндэсний уламжлалт уран хатгамалын дугуйланг үнэ төлбөргүй ажиллуулсаар С.Ганцэцэг өдгөө 400 орчим шавьтай болоод байна. Мөн түүний охин бага байхаасаа эхлэн уран хатгамлаар хичээллэж эхэлсэн бөгөөд тав дахь үеийн өв тээгч болжээ.
Ийнхүү тэрээр залуу үеийнхэнд үндэсний өв соёл болох уран хатгамлын урлагийг зааж сургах замаар дараа дараагийн үедээ өвлүүлэх, хамгаалан авч үлдэх, түгээн дэлгэрүүлэхэд чухал ач холбогдолтой ажлыг хийсээр байна.
Үндэсний уран бүтээлчдийг дэмжигч банк
ХААН Банкнаас үндэсний өв соёл тээгч авъяаслаг уран бүтээлчдийг тасралтгүй өсч хөгжихөд нь дэмжлэг үзүүлж, бүтээлээ танилцуулах боломжийг ХААН галерейгаараа дамжуулан олгосоор ирсэн. Түүнчлэн, “Цагаан сар”-ын баярыг тохиолдуулан бизнес эрхлэгч харилцагчдаа дэмжих хүрээнд үзэсгэлэнгийн талбай үнэ төлбөргүй гаргаж, борлуулалтаа нэмэгдүүлэх, брэндээ таниулан сурталчлах боломжийг олгодог уламжлалтай. Энэхүү үзэсгэлэн худалдаанд Монголын үндэсний уламжлалт уран хатгамалчдын холбооны гишүүд гурван жил дараалан оролцжээ.
“Би анх үзэсгэлэнд оролцохдоо хөөргөний даалин урлаж танилцуулж байлаа. Харин дараа жил нь уран хатгамлыг ашигласан өдөр тутмын хэрэглээний бүтээгдэхүүнээр оролцоход үзэсгэлэнг зорьж ирсэн хүн бүхэн шагшин гайхаж байсан. Ингээд бодохоор ХААН Банк зөвхөн борлуулалт болон олон нийтэд танигдах боломжийг нэмэгдүүлээд зогсохгүй, уран бүтээлчийн хувьд хэрэглэгчээ ойлгож, тэдний хэрэгцээнд нийцсэн бүтээл туурвих чиглэлээ олоход тус болсон гэдгийг би улам бүр мэдэрсэн” хэмээн С.Ганцэцэг онцлон хэлж байв.
Уг холбоог Монгол Улсдаа нэр цуутай уран хатгамалчид нэгдэн нийлж “Эгнэшгүй санаа” ТББ нэртэйгээр 2005 онд байгуулсан түүхтэй. Тус байгууллага нь үүсгэн байгуулагдсан цагаас хойш нийтдээ дөрвөн удаа уран хатгамалчдын үндэсний уралдааныг зохион байгуулсан. Уг уралдаанд авьяас билгээрээ онцгойрч тэргүүн байр эзэлсэн хатгамалч Монгол Улсын “Уран хатгамалч” цол хүртдэг уламжлалтай. Улмаар эл байгууллага үйл ажиллагаагаа тасралтгүй явуулсаар 2023 онд Монголын үндэсний уламжлалт уран хатгамалчдын холбоо болон өргөжиж өдгөө 100 гаруй гишүүнтэй болжээ.
Цаашдаа С.Ганцэцэг уг холбооны тэргүүний хувиар үйл ажиллагаагаа өргөжүүлж 21 аймаг, есөн дүүрэгт салбар нэгжээ байгуулах стратеги боловсруулжээ. Уг зорилгынхоо хүрээнд одоогоор найман аймагт салбараа байгуулаад амжсан бөгөөд цаашлаад олон улсад салбар нэгжээ байгуулахаар төлөвлөн, урлаг соёлыг дэмжигч ХААН Банктай санхүүгийн бүтээгдэхүүн үйлчилгээгээр урт хугацаанд хамтран ажиллаж, Монголын үндэсний уран хатгамлын ховор бүтээлүүдээ дэлхийд таниулан өсөлтийн түүх бүтээх зорилго өвөрлөн ажиллаж байна.
Бизнесийн эргэн тойронд цахим товхимолд бүртгүүлэхийг хүсвэл ЭНД дарна уу.
