Манай иргэдийн дунд мөнгөө өсгөх хамгийн түгээмэл арга бол хугацаатай хадгаламж. Өнөөдөр арилжааны банкуудын олгож буй хугацаатай хадгаламжийн жилийн дундаж хүү 12.2 хувьтай байгаа нь олон хүний хувьд “аюулгүй” хөрөнгө оруулалт хэмээгддэг. Гэвч энэ нь бодит өгөөжийн хувьд төдийлөн өндөр үзүүлэлт биш юм.
Жишээлбэл, инфляцийн түвшин 9 хувь, 12.2 хувийн хүүтэй хадгаламжийн бодит өгөөж ердөө 3.2 хувь байна. Өөрөөр хэлбэл, таны мөнгө нэрлэсэн дүнгээр өсөж байгаа мэт боловч худалдан авах чадварын хувьд хязгаарлагдмал хэвээр үлдэж байна гэсэн үг.
Ийм нөхцөлд хөрөнгө оруулалтын илүү оновчтой хувилбаруудын нэг нь бонд болон хөрөнгөөр баталгаажсан үнэт цаас юм. Эдгээр санхүүгийн хэрэгслүүд хугацаатай хадгаламжаас ялгаатай нь улирал тутам хүүгийн төлбөр олгож, хөрөнгийн урсгалыг илүү уян хатан байлгадаг. Үүнээс гадна Засгийн газрын болон хувийн хэвшлийн гаргасан бондуудын жилийн өгөөж дунджаар 5-9 хувийн хооронд хэлбэлздэг. Зарим бонд болон хөрөнгөөр баталгаажсан үнэт цаас өндөр өгөөж санал болгодог бөгөөд хөрөнгийн зах зээлийн өсөлттэй уялдан үнэ нь ч өсөх боломжтой байдаг.
Бонд, хөрөнгөөр баталгаажсан үнэт цаас зэрэг санхүүгийн хэрэгслийн бас нэг давуу тал нь татварын ачаалал багатай байдагт оршино.
Хэдийгээр хадгаламж эрсдэл багатай, ойлгомжтой арга мэт харагддаг ч инфляцийн өндөр орчинд урт хугацаанд мөнгөө үнэгүйдүүлэх эрсдэлтэй. Харин хөрөнгө оруулалт бол илүү оновчтой, төлөвлөсөн шийдвэр шаардсан алхам. Бонд, үнэт цаас зэрэг нь анхлан хөрөнгө оруулагчдад хэт төвөгтэй мэт санагдаж болох ч зөв судалгаа, зөвлөгөөний дагуу сонголтоо хийвэл өгөөжтэй, баталгаатай хөрөнгө оруулалт болж чадна. Тэгвэл эдгээр хамгийн эрсдэлгүй хөрөнгө оруулалтын талаар Business.mn Podcast-ийн 309-р дугаарт ярилцсан юм.
