Дэлхийн 78 улсад 11 мянга гаруй салбартай, 40 дэх жилдээ амжилттай үйл ажиллагаа явуулж буй BNI (Business Network International) байгууллага манай улсад 2022 оны дөрөвдүгээр сараас эхлэн франчайз эрхтэй нэвтэрсэн билээ. BNI бол бизнес эрхлэгчдийн хооронд харилцан ашигтай хамтын ажиллагааг бий болгодог, олон улсын мэргэжлийн бизнес нетворк байгууллага юм.
Тус байгууллага Монгол Улсад хөл тавьснаас хойш 15 салбар, 700 гаруй бизнес эрхлэгч гишүүнчлэлтэй болжээ. BNI Mongolia-ийн ууган салбаруудын нэг BNI Karakorum in Mongolia 2025 онд шинэ удирдлагын багтай болоод буй. Тодруулбал, тус салбарын Ерөнхийлөгчөөр “Царамтайн Арвай” ХХК-ийн үүсгэн байгуулагч Э.Жавхланбаяр, Дэд ерөнхийлөгчөөр Celeb MGL Agency ХХК-ийн гүйцэтгэх захирал М.Цэдэвдолгор,Санхүүч, Ерөнхий нарийн бичгийн даргаар Anar Grand ХХК-ийн захирал Ж.Алтанбагана нар томилогдоод байна.
Шинэхэн удирдлагын баг цаашид гишүүдийн бизнесийг олон нийт болон олон улсад сурталчлах, реферал буюу санал болгож буй бизнес боломжуудын чанар, үр өгөөжийг 35 хувиар нэмэгдүүлэх гэх мэт томоохон зорилгын төлөө ажиллахаар зорьж байгаа аж.
BNI-д гишүүнээр элссэнээр мөнгөөр үнэлэх боломжгүй олон үнэ цэнийг олж авдаг.
Тус байгууллагын үйл ажиллагаа хэд хэдэн онцлогтой. Тухайлбал, нэг салбараас нэг л компанийг гишүүнээр элсүүлдэг зарчимтай учир ижил төрлийн бизнесүүд хоорондоо өрсөлдөх бус харин хамтрах, хөгжих боломж бүрддэг.
“BNI-д гишүүнээр элсэх нь мөнгөөр үнэлж баршгүй үнэ цэнийг олж авдаг гэдгийг би өөрийн туршлагаас мэдэрсэн” хэмээн BNI Karakorum in Mongolia салбарын ерөнхийлөгч Э.Жавхланбаяр онцолж байлаа.
Түүнчлэн BNI-д зөвхөн шийдвэр гаргах түвшний бизнес эрхлэгчид элсдэг тул гишүүд хоорондоо итгэлцэлд суурилсан хүчирхэг хүрээлэл бий болгож, бизнесийн үйл ажиллагааг харилцан дэмжиж ажилладаг. Жишээлбэл, борлуулалтын орлогоо системтэй өсгөх, бизнесээ дараагийн шатанд гаргах, олон улсын зах зээлд өрсөлдөх, инновац, хөрөнгө оруулалтын шинэ боломжуудыг нээх, суралцах, хөгжих, туршлагаа хуваалцах, дэлхийн түвшний хамтрагчтай болох зэрэг боломжууд нээгддэг аж.
Ташрамд дурдахад, BNI салбарын гишүүд долоо хоногт нэг удаа өглөө бүр 07:30 – 10:00 цагийн хооронд уулзалт хийж, харилцан боломж үүсгэн, борлуулалтаа өсгөх, бизнестээ шинэ хамтрагч олох зэрэг олон боломжийг эрэлхийлдэг байна.
