Олон байгууллага ERP системийг “ид шидийн саваа” мэтээр төсөөлдөг. ERP л нэвтрүүлчихвэл бүх асуудал шийдэгдэнэ гэж боддог. Гэтэл бодит байдал дээр, системээс өмнө бэлтгэх ёстой хамгийн чухал зүйл бол программ биш харин байгууллагын дотоод процесс юм. Хэрвээ та байшин барих гэж байгаа бол эхлээд сууриа цутгах ёстой. Тэгвэл ERP систем ч мөн адил дотоод үйл ажиллагаагаа сайтар боловсруулалгүйгээр нэвтрүүлэх гэж оролдвол “ид шидийн саваанаас” илүүтэй хүндрэл дагуулж мэднэ.
Иймд ERP систем сонгохдоо танай компанийн менежментийн процесс, үйл ажиллагааны уялдаа холбоог бүрэн хангаж чадах эсэхийг нягтлах нь чухал. Мөн байгууллагын онцлогт тохирсон, тавигдах шаардлагыг бүрэн хангахуйц, тулгарч буй асуудлыг шийдвэрлэж чадах эсэхийг сайтар үнэлэх хэрэгтэй. Үүнээс гадна сонгосон систем урт хугацаанд найдвартай ажиллах, цаашид хөгжүүлэлт хийх боломжтой байх нь чухал үзүүлэлтүүдийн нэг.
ERP системийг нэвтрүүлэх гэж буй байгууллагууд эхлээд үйл ажиллагааныхаа процессыг нарийвчлан тодорхойлж, бэлэн болгох нь хамгийн чухал үе шат. Үүнийг хийхдээ менежментийн чиглэлээр мэргэшсэн зөвлөхүүдээс зөвлөгөө авч, дотоод үйл ажиллагаагаа сайтар бэлтгэсний дараа систем нэвтрүүлэх хэрэгтэй. Харин бэлтгэл ажил хийгээгүй, зөвхөн програм хангамж дээр мэдээлэл бүртгэх ажилд анхаардаг байгууллагууд цөөнгүй. Энэ нь мэдээллийн боловсруулалт хийх боломжийг хязгаарлаж, ERP системийн үр өгөөжийг бууруулдаг. Тиймээс систем нэвтрүүлэхээсээ өмнө дотоод процессоо сайтар боловсруулж, бэлтгэл ажлыг хангах нь байгууллагын хувьд урт хугацааны үр дүнд хүрэх гол хүчин зүйл юм.
Нэн тэргүүнд:
- Одоо байгаа ажлын процессоо зураглах
- Асуудлуудыг илрүүлж, сайжруулах шийдлээ тодорхойлох
- Бүх хэлтсийн оролцоог хангах
- ERP-д шилжүүлэх боломжтой процессуудыг сонгох
- Үндсэн зорилгоо тодорхойлох хэрэгтэй
Магадгүй уншигч танд энэ төрлийн системийг нэвтрүүлэх эсвэл бодит үр дүнг нь хүртэж чадахгүй, төөрөлдөсөн зэрэг бэрхшээл тулгарсан бол Business.mn Podcast-ийн 310 дах дугаарт оролцсон Асма консалтинг ХХК-ийн Борлуулалт менежментийн зөвлөх Д.Равдангийн подкастыг сонирхоно уу.
