“Мөнхийн Тун” ХХК, “Монгол Эм Импекс Концерн” ХХК болон БНСУ-ын DongKoo Bio&Pharma-ын хамтарсан “МDM ампул фарма ” ХХК, тарилгын эмийн үйлдвэр энэ сарын 12-нд үйл ажиллагаагаа албан ёсоор нээлээ.
Монгол, БНСУ-ын хамтарсан энэхүү үйлдвэр нь манай улсын иргэд, эрүүл мэндийн байгууллагыг чанартай, аюулгүй, эмчилгээний өндөр идэвхтэй, импортыг орлох чадамж бүхий эмээр хангах бөгөөд БНСУ-ын эм үйлдвэрлэлийн зохистой дадал (Korean GMP)-ын шаардлагыг хангахаар зорьж буй. Энэхүү тарилгын эмийн үйлдвэр нь жилд 25-40 сая ширхэг тарилгын эмийн бүтээгдэхүүн үйлдвэрлэх хүчин чадалтай аж. Тодруулбал, 20 гаруй нэр төрлийн эмийн бүтээгдэхүүнийг өндөр чанартай технологийн дагуу үйлдвэрлэж, зах зээлийн үнээс 15–20 хувиар хямд үнээр дотоодын хэрэглэгчдэд хүргэх юм байна.
Үйлдвэрийн нээлтийн үйл ажиллагаанд УИХ-ын гишүүд болон “Мөнхийн Тун” ХХК, МДМ ампул фарма ХХК, DongKoo Bio&Pharma Co.,Ltd ТУЗ -ийн дарга Cho Yong Joon, “Монгол Эм Импекс Концерн” ХХК -ийн гүйцэтгэх захирал Б.Болормаа нар оролцлоо. МDM ампул, тарилгын эмийн үйлдвэрийн төсөл 2022 онд Эрүүлийг хамгаалахын гавьяат ажилтан Ц.Алтанцэцэгийн санаачлагаар эхэлж, 2024 оны хоёрдугаар сарын 1-ны өдөр хөрөнгө оруулалтаа босгох зорилгоор DongKoo Bio&Pharma Co.,Ltd болон “Монгол Эм Импекс Концерн”-д хамтрах санал тавьснаар хамтын ажиллагааны гэрээ байгуулж, албан ёсоор Монгол, Солонгосын хамтарсан үйлдвэрийн төслийн суурийг нь тавьж байжээ.
Үйлдвэр зөвхөн эрүүл мэндийн салбарт төдийгүй байгаль орчны хамгаалал, ногоон хөгжилд бодит хувь нэмэр оруулж, байгальд ээлтэй, хэмнэлттэй үйлдвэрлэлийн шинэ жишиг болж буй.
Онцлоход барилгын угсралтын ажлыг улсын төсвийн хөрөнгөөр бус манай улсын барилгын салбарын томоохон төлөөлөл болох ЖТЛ ХХК олон улсын стандартын дагуу чанарын өндөр түвшинд гүйцэтгэжээ. Харин үйлдвэрийн цэвэр өрөөний систем, агааржуулалтын шийдэл, ус боловсруулалтын байршил, бусад инженерийн дэд бүтцийн төлөвлөлт, суурилуулалтын ажлыг БНХАУ-ын “Linsen Group” группийн охин компани Line link Purification хариуцан гүйцэтгэсэн юм байна. Үүний дараагаар үйлдвэрийн тоног төхөөрөмжийн анхны FAT буюу үйлдвэрийн хүлээлцэх туршилтыг 2024 оны 11 дүгээр сараас эхлэн зургаа удаа хийжээ. Уг туршилтыг Монгол, БНСУ-ын инженер, техникчдээс бүрдсэн 20 гаруй мэргэжилтэн бүхий баг хариуцан гүйцэтгэж тоног төхөөрөмжийг олон улсын стандартын дагуу амжилттай хүлээлгэжээ.
Үндэсний үйлдвэрлэлээ хөгжүүлэх, эмийн чанарыг сайжруулах тал дээр манай улсын эмийн үйлдвэрүүд бүгд дор бүрнээ хичээнгүйлэн ажиллаж байна.
“Мөнхийн Тун” ХХК-ийн Ерөнхий захирал, МДМ Ампул үйлдвэрийн ТУЗ-ын дарга, МУ-ын Эрүүлийг хамгаалахын гавьяат ажилтан Ц.Алтанцэцэг:
Миний бие эм зүйн салбарт 44 дэх жилдээ ажиллаж байна. Монгол Улсын эрүүл мэндийн салбар, тэр дундаа эм зүйн салбарыг хөгжүүлэхэд бага ч атугай хувь нэмэр оруулах нь миний амьдралын ухамсарт зорилго, үүрэг хариуцлага байсаар ирсэн. Тэр ч үүднээсээ, шахмал эмийн үйлдвэр, капсультай эмийн үйлдвэр, эмнэлгийн нэг удаагийн хэрэгслийн үйлдвэр, дуслын шингэний үйлдвэр, тариурын үйлдвэр гэх мэт 7 төслийг Мөнхийн тун ХХК дангаар болон эм зүйн салбарын бусад хувийн хэвшлийн байгууллагуудтай хамтран амжилттай хэрэгжүүлж, бойжуулаад байна. Туншилтай эмийн үйлдвэр манай Мөнхийн тун ХХК-ийн 8 дахь төсөл болж байна. Монгол Улсын эм зүйн салбар, тэр дундаа эм үйлдвэрлэлийн салбарын хөгжлийг 2 шат ахиулах том зорилгыг өмнөө тавьж, БНСУ-ын Донгкоо био энд фарма болон Монгол Улсын эм хангамжийн ууган байгууллага болох Монгол Эм Импекс Концерн-той амжилттай хамтран ажиллалаа. Өнөөдөр төслийн үр дүнд бий болсон шинэ үйлдвэрийнхээ үүд хаалгыг албан ёсоор нээж байгаадаа туйлын сэтгэл хангалуун байна. Үндэсний үйлдвэрлэлээ хөгжүүлэх, эмийн чанарыг сайжруулах тал дээр манай улсын эмийн үйлдвэрүүд бүгд дор бүрнээ хичээнгүйлэн ажиллаж байгаа бөгөөд цаашид ч ажиллах болно. Харин бидэнд төрийн бодлогын дэмжлэг бодитойгоор хэрэгтэй байгааг цохон тэмдэглэж, цаашид үндэсний эмийн үйлдвэрүүдийн хөгжилд бодлогын дэмжлэг үзүүлж, хувийн хэвшилтэйгээ хамтран ажиллана гэдэгт найдаж байна. Эцэст нь төслийг хэрэгжиж эхлэх үеэс эхлэн хамт байсан нийт ажилтан, хамтран зүтгэгчиддээ чин сэтгэлийн талархал илэрхийлье хэмээв.
Үйлдвэр ашиглалтад орж, бүрэн хүчин чадлаараа ажилласнаар улсын төсөвт 4.9 тэрбум төгрөгийн татварын орлого төвлөрүүлэх боломж бүрдэж байна.
“Монгол Эм Импекс Концерн” ХХК-ийн Гүйцэтгэх захирал Б.Болормаа:
Монгол Улсын эм хангамжийн салбарт бодитой хувь нэмэр оруулах зорилгоор дотоодын болон гадаадын байгууллагууд хамтран энэхүү томоохон төслийг амжилттай хэрэгжүүллээ. Тодруулбал, БНСУ-ын эмийн үйлдвэрлэл, худалдааны салбарт тэргүүлэгч “DongKoo Bio&Pharma” компани, “Мөнхийн Тун ХХК” болон манай компани олон улсын стандартад нийцсэн, аюулгүй, найдвартай, чанартай эм бэлдмэл үйлдвэрлэж, Монголын ард иргэдэд хүргэх боломжтой боллоо. Энэ бол хоёр орны хамтын ажиллагаанд шинэ хуудсыг нээсэн чухал үйл явдал юм. Энэхүү төслийн хүрээнд сүүлийн үеийн шаардлагыг хангасан тоног төхөөрөмж ашиглаж, импортыг орлох, хөнгөлөлттэй үнээр буюу 20 гаруй нэр төрлийн эмийн бүтээгдэхүүнийг, зах зээлийн үнээс 15–20 хувиар хямд үнээр дотоодын хэрэглэгчдэд хүргэх боломж бүрдэж байгаад бид туйлын баяртай байна хэмээв.
МDM ампул, тарилгын эмийн үйлдвэрийн үйл ажиллагааны үеэр Монгол улсын Засгийн газрын гишүүн, Эрүүл мэндийн сайд Т.Мөнхсайханы тушаалаар Үйлдвэр хариуцсан захирал Lee Sung Woong, Ерөнхий инженер Kang Seung Dong нарыг Монгол Улсын Эрүүл мэндийн яамны хүндэт тэмдгээр шагнасан юм.
DongKoo Bio&Pharma Co.,Ltd ТУЗ -ийн дарга Cho Yong Joon:
Өнөөдрийн арга хэмжээ зөвхөн эмийн үйлдвэр ашиглалтад орж буйг тэмдэглэхээс илүү Монгол, Солонгос улсын эмийн салбарын хамтын ажиллагааны шинэ хуудсыг нээж буй түүхэн мөч юм. Тодруулбал, БНСУ-ын эмийн үйлдвэр болох Dongkoo Bio & Pharma компани нь Монгол улсын эмийн үйлдвэрт шууд хөрөнгө оруулалтыг хийж, үйлдвэрлэлийн хамтын ажиллагаа явуулж буй анхны тохиолдол болж байгаагаараа илүү ач холбогдолтой юм.
Dongkoo Bio & Pharma компани нь МДМ ампул үйлдвэрийг Солонгос улсын KGMP чанарт нийцсэн үйлдвэрлэлийн байгууламж болоход мэргэжлийн боловсон хүчин илгээх, үйлдвэрийн зураг төсөл боловсруулах, үйлдвэрлэлийн тоног төхөөрөмжийг сонгох, үйлдвэрлэлийн технологи шилжүүлэлтийг хийх, үйлдвэрийн үйл ажиллагаа, удирдлагын тогтолцоог бүрдүүлэх зэрэг бүхий л салбарт хамтран ажиллаж байна. Мөн үйлдвэрлэлийн мэргэжилтнүүдийг БНСУ-д урин, тухайн ажилтан ур чадвараа дээшлүүлэн чанартай боловсон хүчин бэлтгэхэд дэмжин ажилласан. Эдгээр хүчин чармайлтын үр дүнд Монголд ампул үйлдвэрлэх чадварлаг үйлдвэр баригдаж дууссаныг зарлаж буй өнөөдрийн нээлтийн арга хэмжээнд оролцож байгаадаа маш их баяртай байна. Үүний зэрэгцээ МДМ ампул фармад үйлдвэрлэсэн шилдэг бүтээгдэхүүнүүд нь Монголын зах зээлд дээд зэргийн чанартай бүтээгдэхүүн байх байр сууриа баталгаажуулаад зогсохгүй дэлхийн улс орнуудад экспортлогдож, дэлхийн үйлдвэрлэлийн бааз болон хөгжинө гэдэгт итгэлтэй байна хэмээв.
Мөн тэрбээр тус өдрийн үйл явдлыг дурсаж, хоёр компанийн найрамдал, хамтын ажиллагааг хүсэн ерөөж, МДМ ампул фарма компанийн гүйцэтгэх захиралд Солонгосын уламжлалт цэладон тавгийг бэлэглэсэн юм. Цэладон таваг нь тунгалаг, гүн цэнхэр өнгөтэй ба, түүнийг харсан хүмүүст баяр баясгаланг авчирдаг бөгөөд мянган жилийн дараа ч гоо үзэсгэлэнгээ хадгалдаг гэж үздэг аж. Үүгээрээ хоёр орны эм зүйн салбарын хамтын ажиллагаа, хөгжлийн үлгэр жишээ болон, урт удаан хугацаанд хамтран ажиллахыг чин сэтгэлээсээ хүсэж буйн илрэл юм байна.
Үйлдвэрийн нийт тоног төхөөрөмжийн ажиллагаа, аюулгүй байдал, технологийн горимын дагуу сургалт, дадлагад бүрэн хангасан тусгайлан бэлтгэгдсэн долоон оператор, хоёр инженер ажиллаж буй. Үндсэн технологийн тоног төхөөрөмжийг БНХАУ-ын Turking Technology Limited компанитай байгуулсан гэрээний дагуу нийлүүлсэн юм байна. Харин манай улсад өнгөрсөн оны дөрөвдүгээр сард орж ирж, суурилуулалтын ажил эхэлж, угсралт, тохируулгын ажлыг нийт арван инженерээс баг хариуцан 9 сарын хугацаанд гүйцэтгэжээ. Уг угсралт, суурилуулалтын ажилд БНСУ-аас томилогдсон инженерүүд хяналт тавьж, техникийн зөвлөмжөөр хангаж ажиллажээ.
“МDM ампул фарма ” ХХК,тарилгын эмийн үйлдвэр энэ сарын 12-нд үйл ажиллагаагаа албан ёсоор нээлээ. , тарилгын эмийн үйлдвэрМонгол Улсад анх удаа дэлхийн стандартад нийцсэн тоног төхөөрөмж, шинэ аргачлал, технологийг оруулж ирж байгаа томоохон төсөл юм.
Монголын эм зүйн байгууллагуудын нэгдсэн “ЭМ” холбооны тэргүүн Д.Энхжаргал:
“Тус үйлдвэр нь олон тооны ажлын байрыг шинээр бий болгож байгаа. Зөвхөн Монгол мэргэжилтнүүд ч бус, БНСУ-д 30 гаруй жил эмийн чанар, аюулгүй байдлын чиглэлээр ажилласан инженерүүд болон мэргэшсэн эм зүйчид энэ төсөлд оролцож, тоног төхөөрөмжийн суурилуулалт, ажиллагааны баталгааг хангаж ажиллаж буй. Үнэхээр хүчтэй, мэдлэг чадвартай, судалгаа шинжилгээнд суурилсан баг бүрдсэн гэж харж байна. Хоёрдугаарт, манай улсад эмийн чанар, аюулгүй байдлыг үргэлж хөндөж ярьсаар ирсэн. Харин энэ үйлдвэр олон улсын стандартад нийцсэн орчинд, лабораторийн нарийн шинжилгээний үндсэн дээр бүтээгдэхүүн үйлдвэрлэж байгаа учраас хэрэглэгчид итгэлтэй байж болно. Үнэхээр баталгаатай гэж хэлж чадна. Эдийн засгийн хувьд ч энэ төсөл чухал ач холбогдолтой. Өмнө нь эм, эмнэлгийн хэрэгсэлд зориулсан валют гадагшаа урссаар ирсэн. Харин одоо энэ үйлдвэр Монголын хэрэглэгчдийг хангаад зогсохгүй, олон улсад экспортлох бүрэн боломжтой. Өнгөрсөн оны аравдугаар сарын 1-нээс эм, эмнэлгийн хэрэгслийн шинжилгээний тухай хууль батлагдаж, экспортын эрх зүйн орчин тодорхой болсон нь үүнд том түлхэц болж байна. Мөн байгаль орчинд ээлтэй, хариуцлагатай технологи ашиглаж буй нь онцгой. Үйлдвэрлэлд ашиглагдсан усыг бүрэн цэвэршүүлж, мод зүлэг услах зэрэг байгальд ээлтэй зорилгоор дахин ашиглаж байна. Үйлдвэр нь өндөр цэвэршилттэй усыг ашиглан тарилгын эм бэлдмэл үйлдвэрлэж байгаа тул энэ шаардлагад нийцсэн дэвшилтэт усны технологийг нэвтрүүлсэн хэмээв.
