Гадаад улсад сурах боломж бүрдсэн үед хүмүүсийн олонх нь “хаана” сурах вэ гэж боддог. Гэтэл хамгийн эхэнд “юу сурах вэ” гэдэг нь чухал асуулт байх хэрэгтэй. Учир нь тухайн сурах гэж буй орны нийгмийн бүтэц, хэлний орчин, хууль эрх зүйн тогтолцоо, хөдөлмөрийн зах зээлийн хэрэгцээ зэргийг харгалзан мэргэжлээ сонгохгүй бол сургалтын дараа ажил, амьдралын тодорхой бус байдалтай нүүр тулгарах нь элбэг байх эрсдэлтэй.
Жишээлбэл, зарим мэргэжил олон улсад нийтлэг хэрэглээтэй байдаг. Аялал жуулчлал, зочлох үйлчилгээ, мэдээллийн технологи, олон улсын харилцаа зэрэг салбар гадаад иргэдэд харьцангуй нээлттэй байдаг. Харин хууль, анагаах ухаан зэрэг мэргэжлүүд нь тухайн орны дотоод эрх зүй, иргэншлийн шаардлага, тусгай зөвшөөрөлтэй нягт уялддаг тул гадаад оюутнуудад шууд ажиллах боломж хязгаарлагдмал.
Мөн гадаадад сурч төгсөөд эх орондоо мэргэжлээрээ ажиллах гэж байгаа бол таны диплом Монголын системд хэрхэн хүлээн зөвшөөрөгдөх, мэргэжлийн шалгалт, тусгай эрхийн шаардлагыг давж чадах эсэхээ судлах шаардлагатай. Тиймээс “гадаадад сурсан” гэдэг ганцхан шалтгаанаар биш, зорилтот үр дүнтэй сургалт, тодорхой карьер төлөвлөгөөтэй сонголт хийх нь л амжилтын үндэс болдог. Уншигч та энэ талаар дэлгэрэнгүй танилцахыг хүсвэл Business.mn подкаст-ын 315-р дугаарыг үзнэ үү.
