“Бизнес цэнэг” өглөөний уулзалтын “Sharing is caring” хэсэгт маркетер Гэрэлт-Одын тавьсан илтгэлээс гол санаануудыг тоймлон хүргэж байна.
🤳 Лайв хийлгэчихье гээд л байвал лайваасаа өөр юмгүй л үлдэнэ шүү!
Контент маркетинг гэж онолын юм ярихаас илүү нэг л зүйлийг сануулж хэлье. “Бизнесийн эзэн та өөрөө өөрийгөө ярьж чадахгүй бол, өөрийгөө үнэхээр лаг гэдгийг хэнд ч ойлгуулж чадахгүй”.
“Борлуулалт унахаар л лайв хийлгэнэ гэдэг. Инфлюенсерийг л гарц гэж хараад, ‘манай бизнест амь тариа хийгээд өгчих” гэсэн байдлаар ханддаг бол та бизнестээ хэтэрхий сэтгэлгүй хандаж байна гэсэн үг.
Өөрөөсөө түлхэх бус, өөрөө хөдөлж байж л контент амь орно. Ингэхгүй бол “та лам дээр очоод ханийн тэнгэр дуудаад өгөөч гэж залбирч байгаа сингл шиг” л харагдана. Хэн нэгэн таны оронд маркетинг хийхгүй ээ.
Утас, микрофон, сэтгэл гурав л байхад контент эхэлнэ
Контент бүтээнэ гэхээр бүгд сүрддэг. Студи, найруулагч, камер, гэрэл, зургийн баг гээд төсөөлөл нь Том Крузын кино шиг л юм төсөөлчихдөг.
Гэтэл энэ нь нүсэр баг, тоног төхөөрөмж гэхээс илүү өөрийн бүтээгдэхүүн, үйлчилгээний мөн чанарыг ойлгохтой холбоотой байдаг.
Тэрээр Харвардын профессор Кристенсенийн жишээг дурдсан: Хүмүүс смүүтиг зүгээр цангаж уудаггүй. Харин машин барьж явахад завааруулдаггүй, удаан уудаг зүйлийг хүсдэг учраас сонгодог. Харин банан идвэл хальсыг нь хааш нь хаяхаа мэдэхгүй.
Тэгэхээр таны бүтээгдэхүүн яг ямар ажлыг “хийж өгдөг”-ийг та өөрөө ойлгох хэрэгтэй. Ойлгосон бол тэрийгээ яриад эхэл. “Энэ микрофоныг утсандаа холбочих. Тэгээд зүгээр бич. Эхлээд л бич. Тэгээд бичээд л бай” гэж Гэрэлт-Од зөвлөв.
3 сая төгрөгөөр пост хийлгэж байхаар 30 видео өөрөө хий!
Инфлюенсерийн нэг пост 3 сая. Зарим нь 8 сая хүрнэ. Гэтэл тэр мөнгөөр та өөрөө контентын үйлдвэр болчихож болно. Харамсалтай нь бид “лайв хийлгэчихье” гэдэг ганц төлөвлөгөөтэй.
Гэтэл таны контент таны амьд гэрч байх ёстой. “Таныг өдөр тутам харж байгаа л хүмүүс л таныг үнэлнэ. Бусад нь юу ч мэдэхгүй. Соц сүлжээ бол таныг 50 биш, 500 хүнд харуулах боломж.
Контент хийх гэж айх хэрэггүй ээ, 365 биш, 52-г л хийчих
“365 хоногийн контент хийх” гэхээр бүгд айдаг. Ингэх шаардлагагүй. “7 хоногийн өдрүүдийг сэдэвжүүл. Даваа — танигдалт, Лхагва — эргэлзээ арилгах, Баасан — урамшуулал гэх мэт. Ингээд долоо хоногт 3 контент. Тэгээд жилийн эцэст 52 контент, 365 биш!”
Гол нь тогтмол байх хэрэгтэй. Та гэнэт гарч ирээд “За сайн байцгаана уу?” гэхэд фэйсбүүкийн алгоритм таныг хэнд ч таниулахгүй. Та сар болгон өөрийгөө мартуулж, дараа нь өөрийгөө танилцуулна гэдэг – “хуримаа сар бүр хийж байгаа хүн шиг” л сонин харагдана.
Контент гэж лайк цуглуулах уралдаан биш. Хэрэгтэй байх ёстой.
Хүн өдөрт эрх чөлөөний хөшөөний өндөртэй тэнцэх хэмжээний контентыг скролл хийдэг гэсэн судалгаа байдаг. Та ашиггүй, хэрэггүй юм хийвэл таны контент тэр өндөртэй хамт “булшлагдана.”Тиймээс контент нь хүний асуудлыг шийддэг, хэрэгтэй зүйл өгдөг байх ёстой.
Төлөвлөгөөгүй бизнест ‘постын ид шид’ үйлчлэхгүй
Бид судалгаа хийдэггүй. Төлөвлөгөө байхгүй. Байгаа гэхээр “2013 оны судалгаа байна” гэнэ. Төлөвлөгөө харъя гэхээр “борлуулалтаа 15% өсгөнө гэсэн үгтэй файл” гаргаж ирдэг. Контент төлөвлөлт гэхээр “энэ сувгаар тэгж зар тавина, тэр телевизэд ингэж өгнө, тэр хүнтэй ажиллана” гэхээс хэтэрдэггүй.
Гэтэл танай бүтээгдэхүүнийг хэн худалдаж авдаг вэ, яагаад авдаг вэ гэдэг асуултад хариулж чадахгүй бол та маркетинг хийх болоогүй байна гэсэн үг.
Өөрийгөө дэмждэггүй найзуудаа мартаарай. Танихгүй хүн таныг амжилтад хүргэнэ.
“Таны ойр дотнын найзууд таниас худалдан авалт хийхгүй. Таныг магтах ч үгүй. Харин хар элгийн хүн танд орлого авчирна.” Тиймээс контентоо зөв хүнд хүргэх нь чухал. Өөрт хэрэгтэй гэж бодсон хүнд, өөрийн сэтгэл шингээсэн хэлбэрээр, өөрөө хийж эхлэх нь л маркетингийн амин сүнс.
🎯 Дүгнээд хэлбэл
Контент маркетинг гэдэг бол “Ганхүү лайв хийж өгөөсэй” гэж гуйх биш. “Өөрөө бичлэг хийж, өөрөө үнэ цэнээ ойлгуулж, өөрөө хэрэглэгчийн оюунд нэвтэрч орж” байж л амжилтанд хүрнэ.
Тэгэхээр, контент хийх гэж айж сууснаас, эхлээд нэг бичлэгээ гар утсаараа бич. Харин лайваас өөр юм үлдэхгүй бол лайв хийгээд хэрэггүй.
