Олимпын төрөлд багтдаг 3×3 сагсан бөмбөгийн спорт нь авхаалж самбаа, хурд, хүчний хослол гэдгээрээ онцлог. Уг спорт дэлхийн 150 гаруй улсын сагсан бөмбөгийн холбооны хөтөлбөрт багтсаныг мөн дурдах нь зүйтэй. Жил бүр энэ төрлөөр 1000 гаруй тэмцээн албан ёсоор зохион байгуулагддаг нь хэр өргөн цар хүрээтэйг илтгэнэ.
Дэлхий нийтэд хүлээн зөвшөөрөгдсөн түүх
2010 онд Олон улсын сагсан бөмбөгийн холбооноос анхны тэмцээнийг зохион байгуулснаас хойш дэлхий нийтэд эрчимтэй танигдаж эхэлсэн харьцангуй залуу спортын төрөл бол 3×3. Уг төрөл нь 2020 оны Токиогийн олимпт багтсанаар шинэ спортын нэг болж чаджээ. Одоогоор 150 гаруй улс 3х3 сагсан бөмбөгийн холбоо байгуулсан гэх статистик тоог ОУСБХ (FIBA)-оос гаргаад байна. Өөрөөр хэлбэл, маш богино хугацаанд “трэнд” спортын төрөл болон хөгжиж буй.
Тус спорт 5×5 сагсан бөмбөгт түшиглэн бий болсон ч бусад спортын ерөнхий дүрэм, зохион байгуулалт, бүтцийн хэлбэрүүдийг шингээснээрээ онцлог. Формула 1, жүдо, UFC буюу холимог тулааны спортын нийлбэрээс өнөөгийн хөгжилдөө хүрчээ. 3×3 сагсан бөмбөгийн тэмцээн нь зарим спортын тэмцээний нэгэн адил цуврал байдлаар зохион байгуулагддаг тул улирлын турш сонирхолтой өрсөлдөөнийг үүсгэж, үзэгчдийг байлдан дагуулж чаддаг.
Жишээлбэл, Формула 1 -ийн тухайд хувийн болон улсын чансаа тогтоож, нисгэгчийн оноо өгдөгтэй адил 3×3-ийн тоглогчид, багууд оноо цуглуулж хувийн болоод улсын чансааг тодорхойлдог. Сонирхуулахад, тавдугаар сарын 27-нд Олон улсын сагсан бөмбөгийн холбооноос танилцуулсан шинэчилсэн чансаагаар Монгол Улсын шигшээ багийн тоглогч О.Хулан дэлхийн чансааны ТОП-5-д эрэмбэлэгдсэн юм.
3х3 спортод хөрөнгө оруулах нь том боломж.
Харин жүдогийн спортоос богино хугацаанд тоглох, өдөрт олон тоглолттой байх онцлогийг нь шингээсэн байна. Жүдо бөхийн барилдааны хэлбэртэй төстэй 3×3 сагсан бөмбөгийн тоглолт нь 10 минут үргэлжилж, 21 оноонд хүрэхэд өндөрлөдөг. Ингэснээр нэг өдөрт олон тоглолт зохиогдох боломжтой болно. Мөн жүдогийн олимпын эрхийн оноо цуглуулах системтэй адил 3×3-ын тоглогч, багууд олон улсын албан ёсны тэмцээнд тогтмол оролцож эрхээ цуглуулдаг.
Үүнээс гадна спорт, энтертайнментын хослол болсноороо онцгойрдог холимог тулаан (UFC)-тай төстэй. Ялангуяа, хөгжим, MC, хотын соёл зэрэг элементийг шингээсэн нь 3×3-ыг зөвхөн спорт биш, хотын соёлд нийцсэн урлагийн тоглолт болгож, үүгээрээ хүүхэд залуусын анхаарлыг татдаг.
ЗхЗ-аар Монгол Улс Гиннесийн амжилтад бүртгүүлнэ
Зургаадугаар сарын 23-29-ний өдрүүдэд нийслэлийн төв цэг Сүхбаатарын талбайд FIBA 3×3 World Cup тэмцээн зохион байгуулагдахаар зэхэж байна. Ингэснээр Монгол Улс “Дэлхийн Их Дуулга” (World Tour), “Эмэгтэйчүүдийн дэлхийн цуврал” (Women’s Series) болон насанд хүрэгчдийн Дэлхийн аварга шалгаруулах тэмцээн (World Cup) -үүдийг зохион байгуулсан анхны улс болох юм. Тодруулбал, 3×3-ын дэлхийн шилдэг тоглогчид их эзэн Чингис хааны хөшөөний урд цуглан өрсөлдөж, аваргуудаа тодруулна.
Хурдтай, хотын хэв маягтай, залуусын сонирхлыг соронзон мэт татсан 3×3 сагсан бөмбөг нь дэлхийн спортын бизнес загварыг шинэчилж буй томоохон жишээ. 3×3 бол хамгийн бага зардлаар хамгийн өргөн хүрээнд нөлөөлж чадаж буй багийн спортын төрөл юм. Зах зээл, бизнес талаас нь харвал залуусын илэрхийлэл, хотын соёл, брэндүүдийг таниулах орчин, тухайн улсын урлаг, спортын уялдааг нарийн харуулдаг “шинэ соёл” гэж хэлж болно.
Тийм ч учраас энэ удаагийн тэмцээнийг “М-Си-Эс Кока-Кола”, “Энержи Ресурс” зэрэг Монголын томоохон компани дэмжиж, ивээн тэтгэгчээр хамтран ажиллаж буй нь 3×3 сагсан бөмбөгийн спортын нөлөө, цар хүрээ хэрхэн өргөжиж буйг илтгэнэ. Үүнийг дагаад хувийн хэвшлийнхэн энэхүү спортын арга хэмжээний хүрээнд хамтран ажиллах, хөрөнгө оруулах сонирхол нэмэгдсээр байгаа юм.
