Одоогоос долоон жилийн өмнө бизнес эрхлэгч хэсэг залуус хүүхдийг авто тээврийн осолд өртөхөөс урьдчилан сэргийлэх үүднээс “Гэрэлт цох” компаниа байгуулжээ. Тэд уг компаниараа дамжуулан цацруулагчтай наалтыг зах зээлд нэвтрүүлэх зорилготой байв. Гэхдээ аливаа бизнесийн замнал үргэлж дардан байдаггүйн адил тийм ч амжилттай хэрэгжээгүй аж. Ингээд тэд үйл ажиллагаагаа өргөжүүлж, бүх насныханд зориулсан хувцас хэвлэлийн B2C үйлчилгээг Монголдоо анх удаа нэвтрүүлжээ. Уг санаа нь ч амжилттай хэрэгжиж хувцас хэвлэлийн салбарыг бизнес утгаар нь хөгжүүлэхэд өндөр шат тавьж чадсан юм. Тодруулбал, бизнесээ франчайз загвараар өргөжүүлж, нийслэл дэх зургаан салбараараа дамжуулан хувцас хэвлэлийн үйлчилгээг үзүүлж буй. Энэ туршлагыг уншигч танд хүргэх үүднээс тус компанийн гүйцэтгэх захирал Н.Лхагвабаяртай ярилцлаа.
Н.Лхагвабаяр анх кофе, бэйкери хийдэг, түүгээрээ л амьдралаа төсөөлдөг нэгэн байж. Тэрбээр 2011-2015 онд бариста мэргэжлээрээ ажиллаж, хувиараа кофе шоп ч нээж үзсэн туршлагатай. Ийнхүү зөвхөн кофегоор амьдралаа төсөөлж, карьераа босгож байсан түүний бодлыг нэгэн сургалт орвонгоор нь өөрчилсөн юм. AFA академийн тэр сургалтаас “Хэрвээ та нэг газраа таваас дээш жил ажилласан хэрнээ амьдралд тань ахиц ер гараагүй бол шинийг туршиж үз” гэсэн үг тод үлджээ. Ингээд цоо шинэ мэргэжил, огт өөр орчинд ажиллахыг эрмэлзсэн эрлийн эцэст “Гэрэлт цох” компанийг сонгожээ. Тус компанитай танилцсан түүхээ тэрбээр “Найзынхаа сториноос анх тус ажлын зарыг харан холбогдож орж ирсэн. Тухайн үед “Гэрэлт цох” ST Design-ий салбар нэгж гэж явахаас илүүтэй бие даасан, тогтмол бүтэц рүү шилжих гэж байгаа тул салбарын менежерээр ажиллах санал тавьсан. Хувцас хэвлэлийн Анхны хоёр салбар маань тун амжилттай явж байсан тул салбар бүрийг франчайз хэлбэрт оруулан бие даасан бүтэцтэй болгосон” хэмээн ярьж байлаа.
Илэрхийлэх эрх чөлөө
Өнөөгийн нийгэмд залуус олон талт сонирхол, хоббитой болсон. Дижитал урлаг, кино, аниме, хөгжмийн урсгал, үзэл санааны бүлгэмүүд гээд өөрсдийн дотоод ертөнцөө хуваалцах өргөн орон зай бий. Харин энэ орон зайгаа гадаад төрхөөрөө илэрхийлэх нэг том хэрэгсэл бол хувцас. Гэхдээ брэндийн хувцас маш үнэтэй, зөвхөн тухайн брэндээс гаргасан загвараар өөрийгөө чимэхээс өөр аргагүй байдаг. Нэг үгээр, чөлөөтэй, өөрийнхөөрөө харагдахыг хүссэн залуусын өмнө сонголт хязгаартай. Харин “Гэрэлт цох”-ын хамт олон өөрөө загвараа бүтээж түүгээрээ гоёх эрх чөлөөг хүмүүст олгож буй. Тодруулбал, өөрийн сонирхол, шүтээн, дурсамж, лого зэргээ хувцсан дээр буулгуулж, өөрийн гэсэн цор ганц бүтээлтэй болох боломжтой. Н.Лхагвабаярын онцолсноор, тэд Монголын хамтлаг, дуучин, спортын багийн нэр, лого бүхий хэвлэлийг хувь хүнд зориулан хийдэггүй аж. Өөрөөр хэлбэл, оюуны өмчийг хүндэтгэн, зохиогчийн эрхийг дээдлэн ажилладаг. “Гэрэлт цох”-ын салбар бүрд хоёр хүн ажиллахад өдөрт дунджаар 100 ширхэг хувцас, футболкны захиалгыг нийлүүлэх хүчин чадалтай. Энэ нь зөвхөн хэвлэх үйлчилгээ биш хэрэглэгчдийн хүсэл, мэдрэмжийг хурдтай, чанартай хүргэж буйн илэрхийлэл юм.
Хэрэглэгч төвтэй сэтгэлгээ
“Гэрэлт цох” компанийн франчайз салбар бүр өөрийн байршил, зорилтот хэрэглэгч, үйлчилгээний онцлогоор ялгардаг. Нэг үгээр, хэрэглэгчдийн бодит хэрэгцээнд суурилсан бүтэцтэй. Тухайлбал, M bank arena дахь салбар спортын үйл ажиллагаа, томоохон эвентүүд олноор болдог газар байрладаг онцлогтой. Тиймээс тус салбарт хамтлаг, дуучид, спортын багууд өөрсдийн мерч бүтээгдэхүүнээ захиалж хийлгэхэд тохиромжтой. Харин “Сансрын И-Март” дахь салбар нийслэлийн зүүн бүсэд орших хамгийн том салбар. Энд байгууллагын захиалгууд тогтмол ирдэг. Лого, нэр, уриа үг бүхий хувцас хэрэгсэл, хамт олны бэлэг, арга хэмжээний багц зэргийг цэгцтэй, хурдан гүйцэтгэдэг учир B2B хэрэглэгчдийн төв болжээ. Тэгвэл “Хан-Уулын И-Март” дахь салбарын гол хэрэглэгч нь өсвөр үеийн хүүхдүүд аж. Тэндээс хамгийн олон өнгөт хэвлэлийн захиалга гардаг. Өөрөөр хэлбэл, хүүхэд, залуусын бүтээлч сэтгэлгээ энэ салбараас бүтээл болон гардаг. Харин “Хүннү Молл” дахь салбар Яармаг орчмын хэрэглэгчдэд түлхүү хүрч ажилладаг. Энэ салбарт сургууль, цэцэрлэгүүдийн захиалга зонхилдог. Тогтмол харилцагч байгууллагуудтай ажилладаг тул захиалга, нийлүүлэлтийн хувьд тун зохион байгуулалт сайтай үйлчилдэг.
Улсын их дэлгүүрт байрлах салбар нь монгол үндэсний хэв шинж бүхий бүтээгдэхүүн, туг далбаа, уран зураг, гар бичвэр зэргийг хувцсан дээр хэвлэх захиалгаар голчилдог бол “10 дугаар хорооллын И-Март” дахь салбар нь хотын баруун бүсийн байгууллагуудын хэрэгцээг хангаж ажилладаг. Эдгээр байршлын хувьд түгжрэлээс ангид байх, өөрт ойр салбараас захиалгаа авах зэрэг стратегийн олон ач холбогдолтой. Жишээлбэл, “Сансрын И-Март”-д захиалсан бүтээгдэхүүнээ “Хан-Уулын И-Март”-ын салбараас авах боломжтой. Энэ бол дотоод ложистик, хэрэглэгчийн тав тухыг хослуулсан “Гэрэлт цох”-ын системийн нэг давуу тал юм.
Имижээ өөрөө бүтээ
Тэдний хэрэглэгчдэд санал болгодог Gildan брэндийн футболк нь харшил хөдөлгөхгүй, будаг гардаггүй гэдгээрээ онцлог. Үүгээрээ хүүхэд өмсөхөд нэн тохиромжтой тул гэр бүлээрээ захиалга өгөхөд ямар ч эрсдэлгүй гэдгийг Н.Лхагвабаяр тайлбарлаж байлаа. Уг брэнд blank t-shirt-ний төрөлдөө үнэ хямд атлаа материалын хувьд чанартайд тооцогддог аж. Энэхүү футболк нь ямар ч хэвлэл, зураг, бичиггүй, цул өнгийн, энгийн загвартай хувцас юм. Ихэвчлэн хэвлэл хийх зориулалтаар хувцас үйлдвэрлэгчид ашигладаг. Мөн баг, байгууллага, эвентийн зориулалттай футболкны үндэс загвар юм. Гэхдээ зарим хүмүүс загваргүй, цэвэрхэн хэв маягт дурладаг тул ийм төрлийн футболкийг шууд өдөр тутамдаа өмсөхөөр сонгодог.
Амьсгалдаг, хөвөн даавуун материалтай тул өдөр тутам өмсөхөд нэн тохиромжтой. Мөн хэвлэлийн будаг шингээхдээ сайн зэрэг олон давуу талтайг дурдаж байв. “Гэрэлт цох” компани хэрэглэгчдийн хүсэл, санааг бодитоор биелүүлэхийн тулд төрөл бүрийн хэвлэлийн үйлчилгээг үзүүлдэг. Үүнд:
- Өнгөт хэвлэл
- Зүсэлттэй хэвлэл
- Торгон хэвлэл
- Сублимац (sublimation) хэвлэл
- Стикер хэвлэл
Тухайлбал, зүсэлттэй хэвлэл нь захиалагчийн бэлэн загвар, вектор зураг, эсвэл icon зураг байхад л шууд очоод хэвлүүлэх боломжтой, хамгийн хурдан үйлчилгээний төрөл аж. Харин торгон хэвлэл нь дээд зэргийн нарийвчлал шаардсан, 5000 орчим өнгөний хослол гаргах боломжтой өндөр нарийвчлалтай хэвлэлийн арга юм. Үүнийг голдуу олон өнгө, деталь ихтэй загварыг хэвлэхэд ашигладаг. Гол нь тэд загварлаг харагдахын зэрэгцээ биед эвтэйхэн байх нь чухал гэж үздэг учраас материал, загвар, хүний биеийн онцлогийг бүх талаас нь харгалзсаны үндсэн дээр тохирох хэвлэлийг санал болгодог.
Н.Лхагвабаярын тайлбарлаж буйгаар бүх төрлийн хэвлэлийг ямар ч материал дээр хийх боломжтой гэсэн ойлголт өрөөсгөл. Материалын онцлог, хэвлүүлэх гэж буй зураг, дүрслэлийн хэмжээг харгалзаж бид хэрэглэгчид тохирох материал болон хэвлэлийг санал болгодог хэмээв. Ярилцлагын төгсгөлд тэрбээр байгууллага, хамт олноороо жигд хувцаслах нь зөвхөн үзэгдэх байдал төдий бус нэг төрлийн маркетинг гэдгийг онцолсон юм. Учир нь хувцсаараа жигдрэх нь нэгдмэл дүр төрх үүсгэж, тухайн байгууллагыг товойлгон харуулдаг хүчтэй хэрэгсэл болж чаддаг. Ажилтнууд жигд хувцас өмссөнөөр брэндийн имижийг илүү ойлгомжтой, цэгцтэй түгээж, хэрэглэгчийн итгэлийг нэмэгдүүлэхэд нөлөөлнө. Үүнтэй холбогдуулан “Гэрэлт цох”-ынхон тухайн ажилтан байгууллагынхаа дүрэмт хувцсыг өмсөхдөө тухгүйтдэг бол загварыг дахин боловсруулж, биед эвтэйхэн, орчин үеийн хэв маягтай болгон шинэчлэх шийдлийг танилцуулдаг. Ингэснээр ажилтнууд болон байгууллагын дотоод соёл, үнэ цэнийг илүү сайн илэрхийлж чадах ач холбогдолтой. Түүнчлэн хүмүүс тухайн байгууллагын ажилтнуудыг хялбархан таних боломжтой учраас үйлчилгээний хүртээмжийг нэмэгдүүлэх, харилцааны үр дүнг сайжруулах давуу талтай.
