Хиймэл оюуны 10 ГВт-ын “супер” төсөл
NVIDIA болон OpenAI хамтран түүхэнд байгаагүй том хэмжээний хиймэл оюуны дэд бүтцийн төслийг хэрэгжүүлэхээр боллоо. Тэд нийт 10 гигаватт (GW) хүчин чадал бүхий NVIDIA AI системийг дэлхий даяар байршуулна. Энэ нь 10 цөмийн реактор эсвэл 5 Hoover усан цахилгаан станцтай дүйцэхүйц хэмжээний эрчим хүч юм.
NVIDIA энэхүү төсөлд шат дараалсан байдлаар 100 тэрбум ам.долларын хөрөнгө оруулалт хийхээр төлөвлөсөн бөгөөд анхны үе шат нь 2026 оны сүүлээр Vera Rubin платформ дээр хэрэгжиж эхэлнэ.
“Энэ бол зөвхөн технологийн биш, харин улс орны түвшний эрчим хүчний шийдвэртэй дүйцэх хэмжээний алхам” хэмээн шинжээчид онцолж байна.
Эрэлт ба ирээдүй
АНУ-ын AI дата төвүүдийн эрэлт 2024 онд ердөө 4GW байсан бол 2035 он гэхэд 123GW-д хүрнэ гэж судлаачид тооцоолж байна. NVIDIA–OpenAI-ийн энэхүү ганцхан төсөл ирээдүйн эрэлтийн бараг 8 хувийг дангаараа хангах боломжтой.
Энэ нь зөвхөн технологийн төдий бус, харин эрчим хүч, эдийн засгийн бодлогын түвшинд хүртэл нөлөө үзүүлэх, үндэстний хэмжээний төслүүдтэй дүйхүйц хэмжээний хөтөлбөр болж байна.
Хэрхэн ажиллах вэ?
- Хамтын төлөвлөлт: техник хангамж, дата урсгал, программ хангамжийн кластер, сургалтыг хамтран зохион байгуулна.
- Хамтын оновчлол: кодын түвшнээс (kernels, compilers) эхлээд санах ой, хуваарилалт, сургалтын архитектуртай нийцүүлж “нэг ватт, нэг ам.доллар тутмаас илүү үр дүн” гаргана.
- Шаталсан санхүүжилт: 1GW хүчин чадал ашиглалтад орох бүрд NVIDIA хөрөнгө оруулалтаа үргэлжлүүлнэ.
Төслийн гүйцэтгэлд Microsoft, Oracle, SoftBank болон Stargate зэрэг түншүүд талбайн сонголт, дамжуулах хүчин чадал, худалдан авалтаар оролцоно.
Өнөөдөр Техас мужид OpenAI 4.45 га газарт аварга том AI цогцолбор барих ажлаа эхлээд байна. Энд 6000 гаруй хүн амралтын өдөргүйгээр, 10 цагийн хоёр ээлжээр чөлөө завгүй ажиллаж байна.
Санхүүгийн нөлөө
Эхний 1GW хүчин чадлыг ашиглалтад оруулахад NVIDIA шууд 10 тэрбум ам.долларын хөрөнгө оруулалт хийх бөгөөд дараагийн үе шатуудад үнэлгээнд тулгуурлан санхүүжүүлнэ.
Энэ мэдэгдлийн дараагаар NVIDIA-ийн хувьцааны үнэ 4%-иар өсч, зах зээлийн үнэлгээ 170 тэрбум ам.доллараар нэмэгдэж, үнэлгээ 4.5 их наяд ам.долларт хүрсэн нь компанийн зах зээлд үзүүлэх нөлөө ямар хүчтэйг харуулж байна.
Үүнээс өмнө NVIDIA нь Intel компанид 5 тэрбум ам.долларын хөрөнгө оруулалт хийхээ, мөн Их Британийн AI салбарт 2 тэрбум фунт стерлингийн хөрөнгө оруулахаа зарласан билээ.
Дүгнэлт
NVIDIA болон OpenAI-ийн хамтын ажиллагаа нь зөвхөн хиймэл оюуны хөгжлийг хурдасгах төдий бус, харин дэлхийн эрчим хүч, эдийн засгийн зураглалыг өөрчлөхүйц нөлөөтэй болж байна.
Энэ төсөл нь:
- Ирээдүйн AI дата төвийн эрэлтийг мэдэгдэхүйц хэмжээнд хангах
- Технологи ба эрчим хүчний оновчлолыг нэгтгэсэн шинэ загвар гаргах
- Хөрөнгө оруулалтын цар хүрээгээрээ түүхэнд бичигдэхүйц болж байна.
