Тэнгэр Даатгал нь ХасБанк болон BASE Олон улсын байгууллагатай хамтран “Эрчим хүчний хэмнэлтийн даатгал”-ын механизмыг Монголд анх удаа нэвтрүүллээ.
Эрчим хүчний хэмнэлтийн даатгал нь зөвхөн даатгалын бүтээгдэхүүн бус санхүүгийн болон бусад механизмыг хослуулах замаар сэргээгдэх эрчим хүч, эрчим хүчний хэмнэлттэй тоног төхөөрөмжийн хөрөнгө оруулалтыг нэмэгдүүлэх хөшүүрэг юм.
Өөрөөр хэлбэл ААН байгууллага, иргэдийн эрчим хүчний хэрэглээний дадал хэвшлийг сольж, үр ашигтай, дэвшилтэт технологийг нэвтрүүлэхэд шаардагдах хөрөнгө оруулалтын эрсдэлийг бууруулах, байгальд ээлтэй ногоон технологийн үйлдвэрлэл, худалдаа, хэрэглээг дэмжих зорилготой юм.
Байгууллагын эзэд, удирдлагууд эрчим хүчний хэмнэлттэй технологи бүхий тоног төхөөрөмжид хөрөнгө оруулалт хийснээр үнэхээр хэмнэлт гарах эсэхэд эргэлздэг. Тэгвэл хэмнэгдээгүй эрчим хүчний зардлыг нь даатгалаас нөхөн төлөх нөхцөлтэй тул ингэж эргэлзэх шаардлагагүй ажээ.
Энэхүү даатгалын бүтээгдэхүүнийг НҮБ-ын Байгаль Орчны Хөтөлбөрийн Хамтын ажиллагааны төв болох “BASE” ТББ Монголын зах зээлд нэвтрүүлэх 2017 оны судалгаанд түшиглэн хийжээ.
Эрчим хүчний хэмнэлттэй тоног төхөөрөмжийн шинэчлэлт хийснээр 30-40%-ийн хэмнэлтийг гаргадаг талаар Хасбанкны Эко банкны газрын захирал Г. Туул онцоллоо.
“Тэнгэр даатгал ХХК”-ийн Гүйцэтгэх захирал Ж. Баатарболд:
Энэхүү даатгалын механизм бий болсноор ирэх таван жилийн хугацаанд 500 гаруй байгууллага эрчим хүчний хэмнэлттэй тоног төхөөрөмжид 30 орчим сая долларын хөрөнгө оруулалт хийснээр 234 206 тн хүлэмжийн хийн ялгарлыг бууруулна гэсэн хүлээлттэй байгаа. Технологийн шинэчлэлт хийснээрээ оруулсан хөрөнгө оруулалтаа эрчим хүчний хэмнэлтээрээ дунджаар таван жилийн дотор нөхөж, цаашид эдийн засгийн үр ашгийг нь хүртэх боломжтой.
