Маркетерууд хэрэглэгчидтэйгээ холбогдож, тэдэнд мэдээллээ дамжуулахын тулд урьд өмнөхөөсөө ч илүү хичээл зүтгэл, хөдөлмөр гаргасаар байна. Учир нь орчин үед бизнесүүдийн өрсөлдөөн улам бүр нэмэгдэж, энэ хэрээр үнэнч хэрэглэгчид “устах аюул”-д хүрээд байна. Өдгөө компаниуд хэрэглэгчдийн төлөөх “аян дайн”-даа улам бүр хүч хаяж, маркетингийн арга барил, агуулга, сувгаа ч өөрчилж байна. Тэгвэл энэ цаг үед бизнесийн байгууллагын удирдлагууд, маркетерууд хэрэглэгчээ хэрхэн энгийн аргаар хадгалж үлдэх вэ? Энэ талаар уншигч танд дараах хоёр зөвлөмжийг хүргэж байна.
Шийдвэр гаргах үйл явцаа илүү энгийн болго
Хэрэглэгчээ хадгалж үлдэх хамгийн энгийн, хялбар арга бол тэдний худалдан авах шийдвэрийг чиглүүлж өгөх, итгэлийг нь үргэлж даах гэсэн хоёр үндсэн хүчин зүйлээс хамаарна. Үүнийг маркетерууд тогтмол хэрэгжүүлдэг байх хэрэгтэй. Хэт их мэдээлэлд төөрсөн, мэдээллийг буруу хүлээн авсан хэрэглэгчийн худалдан авах шийдвэр үргэлж хүнд байдалтай тулгардаг. Тиймээс маркетерууд хэрэглэгчдийг хэцүү байдалд оруулахгүй тулд мэдээллээр бөмбөгдөхийн оронд оновчтой мэдээлэл хүргэхэд анхаарах нь чухал. Өөрөөр хэлбэл, худалдан авалтад нь тусалсан байдлаар мэдээлэл өгөхийг илүүд үзэх хэрэгтэй. Энэ нь нэг талаараа хэрэглэгчдийг татаж, нөгөө талаараа хэрэглэгчдээ хадгалж үлдэх боломжийг бий болгож байдаг.
Сонголтыг илүү хялбар болго
Хэрэглэгчийн бүтээгдэхүүн сонгох шийдвэрийг илүү хялбар болгохын тулд брэндүүд өөр өөрсдийн давуу талыг хэрэглэгчдэд тайлбарлаж өгдөг. Зарим нь орц чанараа тайлбарладаг бол зарим нь дараа гарах үр дүнг тайлбарладаг. Тэгвэл зарим тохиолдолд хэт олон зүйлийг тайлбарлах нь хэрэглэгчдэд хэтэрхий төвөгтэй санагдах нь бий. Тиймээс маркетерууд аль болох өөрсдийн бүтээгдэхүүний талаарх мэдээ мэдээлэл, сурталчилгааг маш энгийнээр олон хүчин зүйл хамруулахгүйгээр тайлбарлах хэрэгтэй. Ингэснээр хэрэглэгчдийн хувьд, сонголт хийхэд илүү хялбар, шийдвэр гаргахад дөхөм болдог.
Нийтлэлийн төсгөлд
Бидний энэхүү нийтлэл маркетер танд маш энгийн утга агуулгатай санагдсан байх. Тийм ч байгаасай хэмээн хүссэн юм. Учир нь хэрэглэгчээ хадгалж үлдэх энгийн арга бол худалдан авалтыг чиглүүлэх, сонголтыг хялбар болгох гэсэн үндсэн хоёр зүйлээс л хамгийн хамааралтай гэдгийг онцлохыг зорьсон юм. Маркетерууд хэрэглэгчээ хадгалж үлдэхийн тулд олон сувгийг ашигласан, өргөн утга агуулгатай сурталчилгаа бүтээх бус ердөө хэрэглэгчдийнхээ хамгийн идэвхтэй байгаа сувгууд дээр өөрсдийнхөөр нь идэвхжүүлэх нь чухал. Ихэнх хэрэглэгч танаас харилцааг бус худалдан авах шийдвэр гаргалтад нь туслахыг л хүсдэг. Маркетер танд энэ нь тийм ч хэцүү зүйл биш гэж бодож байна. Танд амжилт хүсье.
Нийтлэгч: Б.Амаржаргал (Мэркадо компанийн Гүйцэтгэх захирал)
Хэрвээ танд маркетингийн зөвлөх үйлчилгээ авах хэрэгцээ, шаардлага байгаа бол бидэнтэй дараах хаягаар холбогдоорой.
Утас: 70177717, 88062226, 99101810
Имэйл хаяг: contact@mercadocompany.com
Цахим хуудас: www.mercadocompany.com
