“Бизнес цэнэг” өглөөний уулзалтын үндсэн илтгэгч Э.Чинзоригийн илтгэлээс “Манлайлагч ба менежер”-ийн тухай санааг тоймлон хүргэж байна.
Орчин цагийн бизнесийн амьдралд “менежмент” ба “манлайлал” гэсэн хоёр нэр томъёо бараг ижил утгатай мэт сонсогдох нь элбэг. Тушаал өгдөг, төлөвлөгөө боловсруулдаг, баг удирддаг хүн бол л удирдагч хэмээн ойлгож заншсан бидний хувьд эдгээрийн сэтгэлгээний суурь ялгааг ойлгох нь чухал.
Зорилгыг хэрхэн харж байна вэ?
Менежер аливаа зорилгыг төлөвлөгөө, үйл ажиллагаа, хяналт гэсэн үндсэн бүрдэл хэсгүүдээр хардаг. Түүний хувьд гол асуулт бол “юу хийх вэ?” гэдэг. Харин манлайлагчийн гол асуулт бол “яагаад хийх ёстой вэ?” юм. Тэр зорилгоо мэдэхээс гадна хамт олон нь тэр зорилгын утга учрыг ойлгож, сэдэл авч байгаа эсэхэд анхаардаг.
Товчхондоо,
“Менежер зорилгоо хэрэгжүүлдэг. Харин манлайлагч зорилгод амьдрал өгдөг”.
Хяналт уу, итгэлцэл үү?
Менежментийн тогтолцоонд хүмүүсийг ажлын гүйцэтгэлээр үнэлж, алдаа гаргахгүй байх нь чухал байдаг. Харин манлайлалд хүмүүсийг итгэлцэл бүхий орчинд хөгжих, шийдвэр гаргах эрх мэдлийг хуваалцах замаар чадваржуулах хандлага давамгайлдаг. Менежерийн зэвсэг бол дүрэм журам, шалгалт, тайлан. Харин манлайлагчийнх бол урам зориг өгөх, сонсох, үлгэр дуурайлал үзүүлэх.
Товчхондоо,
“Хяналт бол айдсаар ажиллуулах систем. Харин итгэлцэл бол урам зоригтой ажиллах орчин”.
Алсын хараа ба өдөр тутмын гүйцэтгэл
Менежер богино хугацааны зорилт, төлөвлөгөө, KPI-д анхаардаг. Харин манлайлагч хүн ирээдүйн чиг хандлага, урт хугацааны өсөлтөд төвлөрдөг. Эдгээр хоёр чиг хандлага зөрчилдөж байгаа мэт боловч үнэн хэрэгтээ тэнцвэртэй орших ёстой. Гэвч удирдлагын түвшний хүмүүс зөвхөн тайлангаар, гүйцэтгэлээр бүхнийг хэмждэг болчихбол урт хугацааны үнэ цэн, алсын хараа мартагддаг.
Товчхондоо,
“Менежер өдөр тутмын асуудлыг зохицуулдаг. Харин манлайлагч ирээдүйн хандлагыг бүтээдэг”.
Албан тушаал ба нөлөөлөл
Менежер хүн албан тушаал, эрх мэдэл дээр тулгуурлан хүмүүсийг удирддаг. Харин манлайлагч хүн үнэт зүйл, хүмүүстэй харилцах арга барил, итгэл дээр суурилан нөлөөлдөг. Өөрөөр хэлбэл, манлайлагч бол албан тушаалаар биш, хандлагаар хүлээн зөвшөөрөгддөг.
Харилцаа
Менежер хүн багийн гишүүдээ ажил үүрэг гүйцэтгэгч гэж хардаг бол манлайлагч тэднийг хөгжих ёстой хувь хүн гэж хардаг. Энэ бол хамгийн том ялгаа. Хүн болгонд давуу тал, суралцах чадвар, зорилго бий. Харин түүнийг олж харах, боломжийг нээх, итгэх, хүндэтгэх нь манлайлагч хүний ур чадвар юм.
Товчхондоо,
“Менежер хүмүүсийг ажлаа сайн хийхийг хүсдэг. Манлайлагч хүмүүсийг өөрсдийгөө сайн хүн болгоход тусалдаг”.
Эцэст нь хэлэхэд,
Менежер байх уу, манлайлагч байх уу гэдэг нь тухайн хүний сэтгэлгээ, зорилгын асуудал. Аль аль нь байгууллагад хэрэгтэй ч, аль нэг нь хэтэрвэл хөгжилд саад болдог. Эцэстээ байгууллага бол хүмүүсийн нэгдэл, харин манлайлал бол тэдний хооронд итгэлцлийн гүүр үүсгэх урлаг юм.
Бизнес эрхлэгч өөртөө дараах асуултыг тавихад илүүдэхгүй:
- Та тушаал өгч байна уу эсвэл сэдэл өгч байна уу?
- Хяналт тавихаас илүү итгэл өгч чадаж байна уу?
- Би яг одоо ямар хандлагаар багтайгаа харьцаж байна вэ?
- Би хүмүүст хэрхэн нөлөөлж байна вэ?
- Миний бүрдүүлсэн орчин хүмүүст урам зориг өгч байна уу, үүрэг даалгавар тулгаж байна уу?
