Виз мэдүүлэх үед “татгалзсан”, “нэмэлт баримт шаардсан” гэдэг үгсийг сонсоод сэтгэлээр унаж байсан хүн цөөнгүй байх. Үнэндээ шалтгаан нь аз дутсан биш, харин анхан шатны хэдэн алдаанаас л үүддэг.
Маягтаа буруу бөглөсөн, бичиг баримт дутуу хавсаргасан, эсвэл овгийн үсэг зөрсөн зэрэг нь өчүүхэн алдаа биш. Элчин сайдын яамны ажилтнууд өдөрт 200–300 хүнтэй харьцдаг. Тэд анхны сэтгэгдлээр л итгэл төрөх эсэхийг мэдэрдэг. Тиймээс “жижигхэн зөрүү” гэж битгий бод.
Ихэнх хүн “мөнгө байвал л болно” гэж боддог. Гэтэл банкны дансанд виз мэдүүлэхийн өмнөхөн гэнэт орсон их хэмжээний орлого бол хамгийн сэжигтэй зүйл. Элчин сайдын ажилтан түүнийг “бэлдсэн байна” гэж ойлгоно. Харин цалингийн тогтмол орлого, татварын баримт, компанийн гэрээ гэх мэт нотолгоо илүү итгэл төрүүлдэг. Тогтвортой ажил, тогтмол орлого, төлөвлөгөөтэй амьдрал зэрэг нь “энэ хүн аялаад буцна” гэсэн дохио болдог.
Мөн хүн бүр виз хүсэхдээ явах тухай ярьдаг, харин буцах тухай бараг бичдэггүй. Гэтэл элчин сайдын яам яг үүнийг л хамгийн их анхаардаг. Буцах шалтгаан тодорхойгүй бол татгалзах магадлал өндөр. Харин ажил, гэр бүл, үл хөдлөх хөрөнгө, бизнес, хүүхэд гээд Монголдоо амьдралтай гэдгээ харуулах зүйлс чинь “буцах баталгаа” болдог. АНУ, Канад, Япон зэрэг оронд ярилцлага визийн шийдвэрийн хагас хувийг эзэлдэг. Хүмүүсийн гаргадаг нийтлэг алдаа бол хэт урт тайлбарлах, сандарч зөрүүтэй ярих, эсвэл хэт найрсаг хандах. Элчин сайдын ажилтан таны үгнээс илүү, хандлага, итгэл, нүдний илэрхийллийг хардаг.
Уншигч та гадаад улсад суралцах боломжууд болон виз мэдүүлэхэд анхаарах зүйлсийн талаар дэлгэрэнгүй мэдэхийг хүсвэл Business.mn подкастын 336 дүгээр дугаарыг үзнэ үү.
