Бизнесийн ертөнцөд хувь хүн, байгууллага, улс орон гээд аль ч түвшинд алсын хараа, үнэт зүйлсээрээ нэгдсэн хамтын ажиллагаа хамгийн сайн үр дүн авчирдаг билээ. Business.mn сайт нь Монголын бизнес дэх инновац, өвөрмөц шийдлүүд, туршлагын талаар өгүүлсэн нийтлэл, материалуудыг нийтэлж, энэ чиглэлд үйл ажиллагаа явуулдаг байгууллагуудтай олон хэлбэрээр нээлттэй хамтарч ажилладаг. Бид энэ алсын харааныхаа хүрээнд “SMS-Startup Marketing Space” менежментийн компанитай хамтын ажиллагааны гэрээ үзэглэлээ.
Дэлхийд гарах хүсэл тэмүүлэлтэй, шинэ санаа, инновацлаг шийдэлтэй энтрепренерүүдийг үе шаттай хөгжүүлдэг “SMS-Startup Marketing Space” компани нь хөрөнгө оруулалт, зөвлөх үйлчилгээ, хамтын оффис, хурдасгуур болон бойжуулах хөтөлбөр гэсэн чиглэлээр старт апуудыг дэмждэг. Байгуулагдсан цагаасаа хойш 124 мянга орчим хүнд хүрч, нийт 10 мянга гаруй цагийн сургалтыг хийгээд байна. Мөн 8.9 тэрбум төгрөгийн хөрөнгө оруулалтыг зуучилсан бөгөөд 1678 цагийн зөвлөх үйлчилгээ үзүүлжээ.
“Бизнесийн зорилго, ажиллах арга барил ойролцоо хоёр байгууллага хамтарч байгаа болохоор олон олон гоё ажлууд хийгдэнэ гэж” гэж “SMS-Startup Marketing Space” компанийн хамтран үүсгэн байгуулагч Т.Мөнхбаяр хэллээ.
Business.mn-ий хувьд 2022 ондоо мэдээллийн ивээн тэтгэгч болж, сонирхолтой цуврал контентуудыг хүргэхээр төлөвлөөд байна.
wpDiscuz