Хэрэв аз жаргалыг эдийн засгийн утгаар илэрхийл гэвэл тэр нь “өсөлт” юм. Мөн өсөлтийг орчин үеийн хүн төрөлхтний гол “бурхан нь” гэж ч ярьдаг.
Монголын хамгийн том банк болох ХААН Банк энэ философийг алсын харааныхаа амин сүнс болгож, бүх л нөөцөө “хамтдаа өсөхөд” зориулах амлалттайгаар IPO хийж, олон нийтэд нээлттэй компани болохоор өнөөдөр үнэт цаасны танилцуулгаа өчигдөр /2023.04.06/ хийлээ.
Нийт 32 жилийн түүхтэй, нэгэнтээ Дэлхийн банкнаас “Татан буулгасан нь дээр” гэдэг дүгнэлт гаргасан удаатай. Гэхдээ тэр цагаас хойш уг банкны нийт хөрөнгө 169 дахин өсөж, нийт актив нь 15 их наяд төгрөг буюу банкны салбарын нийт активын гуравны нэгийг дангаар бүрдүүлэх түвшинд хүрсэн санхүүгийн аварга систем болжээ. Энэ системийн ашигт ажиллагаа, засаглал, технологийн чадамж нь сүүлийн жилүүдэд улам сайжирч гялалзсаар байгаа. 2022 онд л гэхэд 449 тэрбум төгрөгийн татварын дараах цэвэр ашигтай ажилласан байна.
Эдүгээ 2.8 сая харилцагчтай ХААН Банк нэгж хувьцааныхаа үнийг 959 төгрөгөөр үнэлж, нийт хувьцааныхаа 10 хувьтай тэнцэх хэмжээний буюу 191,219,800 ширхэг хувьцааг олон нийтэд санал болгон, нийт 183.4 тэрбум төгрөг татан төвлөрүүлэхээр төлөвлөж байна. Энэ цар хүрээгээрээ Монголын хөрөнгийн биржийн түүхэн дэх хамгийн том IPO болж, мөн бирж дэх хамгийн өндөр үнэлгээтэй /зах зээлийн үнэлгээ нь 1.8 их наяд/ компани болж байна.
ХААН Банк IPO гаргаснаар “Банкнуудын олгох зээлийн хэмжээ нэмэгдэнэ, хүүгийн зардал буурна, хөрөнгө оруулалтын чиглэлтэй, эко төслүүдийг санхүүжүүлэх боломж гарна” ААН Банкны IPO-ын тэргүүлэх андеррайтераар ажиллаж байгаа “БиДиСек ҮЦК” ХК-ийн Ерөнхийлөгч Д.Даянбилгүүн онцоллоо. Тиймдээ ч татан төвлөрүүлэх 183.4 тэрбум төгрөгийн 34 хувийг ногоон төсөл, хөтөлбөрүүдэд зарцуулах юм байна.
Тус банкны гүйцэтгэх захирал Р.Мөнхтуяа “ХААН Банк нь Банкны татварын дараах цэвэр ашгийн 40-өөс дээш хувийг ногдол ашиг хэлбэрээр хуваарилахыг эрмэлзэнэ” гэж хэллээ.
Хувьцааны талаарх мэдээлэл: https://ipo.khanbank.com
Захиалга өгөх: https://ipo.khanbank.com
