Монгол Улсын 335 сум, суурин газарт өндөр хурдны цахим сүлжээ орсноор нийт өрхийн 80 гаруй хувь нь интернэт хэрэглэдэг. Тэгвэл Улаанбаатар хот болон хөдөө орон нутгийн хэмжээнд цахим харилцаа холбоо, олон төрлийн платформуудыг албан байгууллагууд хэрхэн ашигладаг бол.
Бидний амьдралд техник технологи нэвтрэхийн хэрээр ямар ч бизнес, ажил үйлчилгээг сайжруулах арга зам хурдсан, чанаржсаар байна. Өөрөөр хэлбэл бид цахим платформуудыг ашиглан бизнесийн харилцаа холбоогоо хялбарчилж, хурдан шуурхай байдлаар нягт холбоотой ажиллах боломжтой. Тэгвэл байгууллагууд, тэр дундаа төрийн болон төрийн бус байгууллага, хувийн компаниуд цахим сүлжээ, платформуудыг ямар байдлаар хэрхэн ашигладаг талаарх цахим судалгааг Business.mn сэтгүүлээс qwary.com сайтыг ашиглан хийлээ.
Энэхүү судалгаанд нийт 9155 аж ахуйн нэгж байгууллагын ажилчид түүврийн аргаар оролцов. Судалгааг “Танай байгууллага цахим сүлжээ ашигладаг уу, тийм бол ямар цахим платформыг түлхүү ашигладаг вэ, хэчнээн ажилтантай вэ, ямар статустай байгууллага вэ” гэсэн асуултуудын хүрээнд явууллаа.
Цахим судалгаанд оролцогчдын 61 хувь нь хувийн байгууллагад ажилладаг бол 22 хувь нь төрийн байгууллагад, харин үлдсэн 11 хувь нь төрийн өмчийн компанид ажилладаг байна. Цаашлаад байгууллагын хүний нөөцийн тоог ажиглавал хамгийн өндөр үзүүлэлттэй буюу 28.7 хувь нь арав хүртэлх ажилтантай, 25 гаруй хувь нь 10-аас дээш ажилтантай, 23 хувь нь 50-иас дээш ажилтантай гэсэн бол хамгийн бага буюу 22.7 хувь нь 200-гаас дээш хүний нөөцтэй байна.
Судалгааны хамгийн сонирхолтой хэсэг бол байгууллагууд ямар цахим платформыг түлхүү ашигладаг тухай мэдээлэл юм. 9155 хүний 31.2 хувь нь ажил дэрээ и-мэйл түлхүү ашигладаг, 25.1 хувь дотоод чатыг илүү ашигладаг гэсэн байна. Цаашлаад 15 хувь нь сошиал сурталчилгаа хийдэг бол ердөө 16 хувь нь байгууллага албан ёсны веб сайттай гэсэн байна. Харин клауд үйлчилгээг 5.72 хувь, өөрсдийн мобайл аппликэйшн бүтээсэн нь 3.8 хувь, үлдсэн гурван хувь нь ажлын байран дээрээ интернэт огт ашигладаггүй гэжээ.
Харьцуулалтаас харвал хувийн байгууллага и-мэйл болон веб сайтыг хамгийн их ашигладаг байна. Эсрэгээрээ төрийн бус байгууллагууд эдгээр цахим сүлжээг хамгийн бага ашиглагдаг байна. Түүнчлэн клауд үйлчилгээ, дотоод чат, сошиал сурталчилгаа, өөрсдийн мобайл аппликэйшн бүтээсэн зэрэгт хувийн компанийн ашиглах хувь өндөр байгаа бөгөөд үүний араас төрийн байгууллага, төрийн өмчийн компаниуд жагсжээ.
