Цэнхэр тэнгис стратегийн 1-р зарчим энд дарж уншина уу.
Улаан тэнгист байгаа тоглогчид ихэнхдээ хэрхэн одоо байгаа харилцагчдаа тогтоох вэ эсвэл хэрхэн хамгийн нарийн сегментэд хүрч үйлчлэх вэ гэж толгой гашилгадаг. Цэнхэр тэнгис нь одоогийн харилцагчдын ялгаатай тал дээр төвлөрөх биш харин эсрэгээрээ тухайн салбар, компанийн хэрэглэгч-биш хүмүүс юугаараа адилхан бэ гэдэгт төвлөрдөг. 3 зэргийн хэрэглэгч-биш хүмүүс байх бөгөөд Монгол дахь зарим салбарууд хэрхэн шинэ төрлийн хэрэглэгчдийг нээн Цэнхэр тэнгист хүрч болох тухай танилцуулъя.
1-р Зэрэг: Tогтмол бус харилцагчид – танай зах зээлд ороход хамгийн ойр байгаа бүлэг
Энэ зэрэгт байгаа хэрэглэгчид хааяа танайхаар үйлчлүүлдэг боловч арай дээр боломж гарвал шууд танайхыг сонгохоо болино. Эдээр харилцагчдыг татаж авч үлдээхийн тулд гишүүнчлэл, лояалти оноо зэргээр татаж танайхыг сонгохоо болих шалтгаануудыг бууруулах хэрэгтэй. Жишээ нь гоо сайхны салонууд хааяа үйлчлүүлдэг хэрэглэгчдээ лояалти хөнгөлөлтүүд, тогтмол хуваарьтай гишүүнчлэл өгөх зэргээр давтамжтай үйлчлүүлэхэд татаж болно.
2-р Зэрэг: Танай зах зээлийг эсэргүүцдэг – танай бараа, үйлчилгээ хэрэгтэй байгаа ч зугтаадаг бүлэг
Эдгээр хүмүүс одоогоор танай бараа бүтээгдэхүүнийг хүлээн зөвшөөрдөггүй, эсвэл өөрсдийн боломж бололцооноос болж хэрэглэдэггүй. Жишээлбэл Монголд олон арваараа нээгдэж байгаа фитнесс клубууд фитнесст явах дуртай хүмүүс биш дасгал хөдөлгөөн, фитнесст огт дургүй хүмүүсийг онилох юм бол маш том зах зээл нээх боломжтой байна. Энэ хүмүүс яагаад дасгал хийх дургүй байна, фитнесст явахыг хүсэхгүй байна? Тэднийг сэтгэл зүй болон тав тухаар татах боломжууд юу байна зэрэгт анхаарч энэ бүлэгт байгаа хүмүүстэй ярилцаж, санал асуулга явуулбал тэдний анхаарал тавьдаг элементүүдийг нээж шинэ төрлийн үнэ цэн бүтээх болно.
3-р Зэрэг: Нээгээгүй байгаа цоо шинэ хэрэглэгчид – Танай салбараар үйлчлүүлэх хэрэгцээ байхгүй гэж тооцоологдож байгаа хүмүүс
Үл хөдлөх зууч компаниуд ихэнхдээ Улаанбаатарт үйл ажиллагаа явуулах бөгөөд орон нутагт амьдарч байгаа хүмүүст хотод үл хөдлөх хэрэгтэй байх талаар тооцоолдоггүй. Эдгээр хүмүүст Улаанбаатарт үл хөдлөхийг хөрөнгө оруулалт хэлбэрээр авч түрээслүүлэн, урт хугацаанд үнэд хүргэх боломжийг нээх үйлчилгээг нэвтрүүлбэл бусад зууч компаниудын тооцоолоогүй шинэ хэрэглээ үүснэ.
Цэнхэр тэнгис стратегийг бүтээхэд ямар нэг зэрэглэлийн харилцагч-биш хүмүүс дээр төвлөрөлгүй, эдгээр 3 зэрэглэлийн хүмүүсийг сайн таньж мэдээд эдгээр хүмүүст ижилхэн хэрэгтэй байгаа зүйлс дээр төвлөрвөл хамгийн өргөн хэрэгцээ, зах зээл нээгдэх болно.
