Business.mn сайтаас бизнесийн эзэд, удирдлага, менежер, ажилтнуудад зориулаад стратеги, санхүү, хүний нөөц, менежмент, маркетинг, дижитал шилжилт, хувь хүний хөгжилтэй чухал асуултуудын хариултыг #Answered булангаараа цувралаар хүргэж байна.

Улсын бүртгэлээс компанийнхаа гэрчилгээг авснаас хойш 14 өдрийн дотор өөрийн харьяа татварын албанд бүртгүүлэх ёстой. Бүртгүүлэхдээ ААН-үүд ТБ-01, бусад байгууллагын хувьд ТБ-02 маягтыг бөглөснөөр татварын албанаас хувийн хэрэг нээж, та төлөгчийн гэрчилгээгээ авна. Ингэснээр танай байгууллага татварын харилцаанд оролцож эхлэх бөгөөд цаашдаа бизнесийн үйл ажиллагаагаа тэлэхдээ татвараа тооцох, татвараа төлөвлөх хэрэгтэйгээс гадна ер нь татвар төлөгч болно гэдэг хувиараа хөлсний хөдөлмөр эрхлэхээс тэс ондоо зүйл гэдгийг анхаарвал зохино.

Бүртгүүлэхдээ дараах баримт бичгийг бүрдүүлнэ:

Татвар төлөгчийн бүртгэлийн маягт бөглөх (ААН-ийн хувьд ТБ-01 маягт, бусад байгууллагын хувьд ТБ-02 маягт)
Улсын бүртгэлийн гэрчилгээний хуулбар
Хуулийн этгээдийн дүрэм
Үүсгэн байгуулагчийн анкет, иргэний үнэмлэхийн хуулбар
Хуулийн этгээдийн банкны дансны хуулга
Удирдлагын анкет, иргэний үнэмлэхийн хуулбар
Түрээсийн гэрээ (Түрээсийн байранд байрлах бол)

Бүртгэлд нэмэлт, өөрчлөлт оруулахдаа:

Татвар төлөгч нь улсын бүртгэлийн гэрчилгээ, хувийн хэрэгт тусгагдсан зүйл, хөрөнгийн хэмжээ, нэр төрөл, эрхэлж буй ажил үйлчилгээний чиглэл өөрчлөгдсөн тохиолдолд өөрчлөлт орсноос хойш ажлын 20 өдрийн дотор ТБ-06 маягтыг бөглөн харьяалах татварын албанд бүртгүүлнэ.

Татвар төлөгчөөр бүртгүүлэх үүрэг бүхий бусад этгээдийг бүртгэх:

Монгол улсад орлого олж байгаа гадаадын хуулийн этгээдийн төлөөний газрыг харьяа татварын алба татвар төлөгчөөр бүртгэн, татвар төлөгчийн гэрчилгээг олгоно.
Орлогоос бусад татвар ногдох зүйлийг өмчлөгч буюу эзэмшигч нь уг зүйлийг өмчилж, эзэмшиж эхэлснээс хойш нэг сарын дотор харьяалагдах татварын албанд бүртгүүлнэ.
Аж ахуйн нэгж, байгууллага нь үйлдвэрлэл, үйлчилгээ эрхлэх тусгай зөвшөөрлийг төрийн захиргааны холбогдох байгууллагаас авсан өдрөөс хойш 10 хоногийн дотор бүртгэх байгууллага болон харьяалагдах татварын албанд мэдэгдэж татвар төлөгчийн гэрчилгээнд тэмдэглүүлнэ.

Татвар төлөгч харьяаллаа сольж шилжихээр болбол дараах зүйлсийг бүрдүүлнэ:

Хуулийн этгээдийн улсын бүртгэлийн гэрчилгээний хуулбар /хоёр тал/
Татвар төлөгчийн гаргасан шилжих хүсэлт
Санхүүгийн тайлан, баланс (улирлын тайлан өгсөн байх)
Татвар төлөгчийн харьяалал нь өөрчлөгдөх нөхцөл бүрдсэнийг нотлох баримт /ҮХЭХ-ийн гэрчилгээний хуулбар, газрын гэрчилгээ, лиценз, зөвшөөрөл, баг, хорооны засаг даргын тодорхойлолт, түрээсийн гэрээний хуулбар гэх мэт холбогдох бусад баримтууд/

Ямар тохиолдолд татвар төлөгчийн бүртгэлээс хасагдах вэ?