Бүх бизнес анх хэн нэгний хүсэл мөрөөдөл байсан билээ. Энэ ч утгаараа бид хэзээ нэгэн цагт хувийн бизнесээ эхлүүлэхийг мөрөөддө. Хэдий тийм боловч тэдгээрийн ихэнх нь бизнес эхлүүлэхэд анхаарах чухал зүйлсийн талаар хангалттай ойлголттой байдаггүй. Ийм ч учраас шинээр эхлүүлсэн бизнесийн 90 гаруй хувь нь бүтэлгүйтэж, үлдсэн цөөхөн хувь нь амжилттай үргэлжилдэг гэсэн судалгаа бий. Аливаа бизнес юун түрүүнд хүсэл мөрөөдлөөс эхэлдэг учраас хэний ч санал болгоогүй зүйлийг хүмүүст санал болгох боломжтой. Таны эхлүүлэх гэж буй бизнестэй ижил төстэй хэдэн арван, эсвэл хэдэн зуун бизнес байж болох юм. Гэсэн хэдий ч та дараах асуултад хариулт өгч чадсанаар тэрхүү асуудлыг шийдвэрлэх боломжтой. Үүнд
- Би бусдын хийж байгаагаас илүү сайн хийж чадах зүйл юу вэ?
- Би энэ салбарт зах зээлийн тодорхой хувийг эзэлж чадах уу?
Жишээ 1: Үндэсний хувцас үйлдвэрлэгч
Үндэсний хувцасны үнэ цэнийг нэмэгдүүлж, өдөр тутмын хэрэглээ болгох зорилгоор тэмүүлэн ажиллаж байгаа Д.Урнаа өдгөө 49 настай, зорилгынхоо төлөө зогсолтгүй хөдөлмөрлөж байна. 2010 оноос хойш тэрээр үндэсний хэв маягийг орчин үеийн загварын хэв маяг, шийдэлтэй хослуулан дээл, хантааз болон биеийн тамирын хослол, өмд, цамц, куртик зэрэг бүтээгдэхүүнийг хийж байна.
Урнаагийн хувьд, өөрийн хамгийн сайн чаддаг зүйл эсгүүр гаргах, оёдол хийх юм. Тиймээс олон хүнд хувцас урлаж өгөх нь түүний хүсэл мөрөөдөл. Энэ ч утгаараа тэрбээр өөрийн ур чадвараа ашиглан, бизнесээ эхлүүлжээ.
Жишээ 2: Эко гутлын тос үйлдвэрлэгч
“Эзэн хичээвэл заяа хичээнэ” гэж хэлэх дуртай, хөдөлмөрийнхөө үр шимээр амьдрах амттай гэж ярих энэ эмэгтэйг Б.Болор гэдэг. Өдгөө 41 настай, төрөлхийн саажилттай. 2020 онд “Түгээмэл хөгжил” төвийн сургалтад ирдэг байсан Япон хүнээс халгай, жүржийн хальс ашиглан хэрхэн барааны саван хийх ноу-хауг суралцжээ. Сурснаа улам бүр сайжруулж, савангаас гадна эко гутлын тос хийж байна. Б.Болорын мөрөөдөл байгууллагуудад өөрийн бүтээгдэхүүнээ нийлүүлж, хэрэглэгчдээ нэмэгдүүлэх юм.
Болорын жишээнээс харахад, та ямар нэгэн зүйлийг бусдаас илүү хийж чаддаг төрөлх өгөгдөлтэй. Тиймээс түүнийгээ олон хүртлээ маш сайн хөдөлмөрлөөд, олсон хойно бизнес явуулах боломжтой юм.
Анхаар: Гэхдээ танд бизнесийн санаа байж болох ч энэ нь танай бизнесийн зорилтот хэрэглэгчийн тулгамдаж буй асуудлыг шийдэж чадахгүй бол энэ нь урт хугацаанд амжилттай байхад хэцүү юм. Тиймээс хэрэглэгчийнхээ асуудлыг таньж мэдэх, ойлгохоос бизнесийн санаагаа эхлэх хэрэгтэй. Нөгөө талаас хэт том мөрөөдөх хэрэгтэй. Харин бодит байх нь чухал. Таны хүсэл мөрөөдлөөс үүдсэн бизнес нь санаа бүрэн хөгжөөгүй, бодол төдий яриа, судалгаа эсвэл туршлага дээр тулгуурлаагүй, эрсдэл тооцоогүй, хэрэглэгчийнхээ зан чанар, эрэлт хэрэгцээнд нийцэхгүй гэх мэт байж болохгүй. Энэ нь бизнесийн алдаа болж хувирна. Хүсэл мөрөөдлөө бодитоор тооцоолох нь хамгийн түрүүнд тавих зарчим юм.
