Авани Грегг, Жош Ричардс, Белла Поарч зэрэг нэрсийг уншихад танд төдийлэн танил бус санагдаж магадгүй. Харин дэлхийн сая сая тиктокчид энэ нэрсийг андахгүй. Хятадын энтрепренер Жан Имин төрөл бүрийн богино бичлэг хялбархан хийж байршуулах боломжтой TikTok аппыг санаачилсан нь санаанд оромгүй амжилт үзүүлснийг бид мэднэ. Харин өдгөө энэ аппаас төрөн гарсан одуудын орлого дэлхийн зарим топ CEO нарын жилийн орлогоос ч давж, илүүрхэх болжээ. Хамгийн нөлөө бүхий тиктокчдын сая сая дагагчид уг платформ руу маркетинг, сурталчилгааны агентлагаас эхлээд дэлхийн томоохон брэндүүд анхаарал хандуулах гол цөм юм. Үүнийг дагаад асар их хэмжээний мөнгөний урсгал энэ зүгт чиглэж, зах зээл хурдтай тэлж эхэлсэн.
Тухайлбал, хамгийн нөлөө бүхий тиктокчид болох эгч дүү Чарли Д’Амелио (135.8 сая дагагч) болон Дикси Д’Амелио (57 сая дагагч) нарын өнгөрсөн жилийн орлогыг нийлүүлбэл 17.5 сая ам.доллараар хэмжигдэнэ. Өөр нэгэн алдартай тиктокч Аддисон Рэй (86.6 сая дагагч) гэхэд л 8.5 сая ам.долларын орлоготой ажиллажээ. Харин Costco компанийн CEO Крейг Желинекийн өнгөрсөн жилийн орлого 8.3 сая ам.доллар байсан бол Starbucks -ийн CEO Кевин Жонсоных 14.7 сая ам.доллар байв.
Амжилттай тиктокчдын ихэнх нь өмнөх ажлаасаа гарч, TikTok аппыг шинэ контентоор баяжуулах ажлаа үндсэн ажил болгосон байдаг. Тэд дэлхийн томоохон брэндүүдтэй хамтран ажиллаж, дуу бичүүлж, Netflix -ийн кинонд тоглож, бүр өөрийн гэсэн брэндийг үүсгэн байгуулж, шоу бүтээж амжаад байна.
Олон хүн “Тиктокчид бодит баялаг бүтээдэг үү?”, “Тэдний хийж буйг ажил гэж тооцож болох уу?” зэрэг шүүмжилсэн өнгө аястай асуултыг тавьдаг. Харин “Obviously” инфлюнсер маркетингийн агентлагийн үүсгэн байгуулагч, CEO Мэй Карвовски “Хүмүүсийг хөгжөөж, баясгах контент бүтээх нь бараг л 24 цагийн ажил. Нэг ёсондоо, тиктокчид сая сая фэнүүддээ контент бүтээж “үйлчилдэг”. Учир нь тэднийг хаана, юу хийж явааг байнга сонирхон үзэж, даган дуурайж байдаг асар олон хүн бий. Энэ бол хүчтэй нөлөөллийг үүсгэж буй үнэ цэн” хэмээн онцолсон юм. Түүний үүсгэн байгуулсан “Obviously” компани инфлюнсерүүдийн нөлөөллийг ашиглан Google, Amazon, Ulta, Lyft зэрэг дэлхийн томоохон брэндүүдийн маркетингийг хийх үйлчилгээ үзүүлдэг. “Obviously” -тэй төстэй компаниуд цөөнгүй байгуулагдах болсныг ерөнхийд нь инфлюнсер маркетинг агентлаг хэмээн нэрлэж буй. Өөрөөр хэлбэл, сошиал медиа инфлюнсерүүдийг дагасан олон төрлийн бизнесийн урсгал бий болсоор байгаагийн нэг жишээ нь энэ юм.
wpDiscuz